प्रत्यक्ष निर्वाचित कार्यकारी राष्ट्रपति प्रणालीले मात्र स्थिर शासन सम्भवL उपेन्द्र यादव

ईमधेश न्यूज सम्वाददाता,
सप्तरी, १९ माघ । 
जनता समाजवादी पार्टी (जसपा) नेपालका अध्यक्ष उपेन्द्र यादवले जनताद्वारा प्रत्यक्ष निर्वाचित कार्यकारी राष्ट्रपति प्रणाली लागू गरे मात्र देशमा स्थिर, बलियो र जवाफदेही शासन व्यवस्था स्थापित हुन सक्ने दाबी गर्नुभएको छ ।
सप्तरी क्षेत्र नं. ३ का प्रतिनिधिसभा उम्मेदवारसमेत रहनुभएका अध्यक्ष यादवले आइतबार चुनावी अभियानका क्रममा वर्तमान संसदीय अभ्यासले राजनीतिक अस्थिरता जन्माएको भन्दै शासन प्रणालीमै सुधार आवश्यक रहेको बताउनुभयो । उहाँले बारम्बार सरकार फेरिने, नीति तथा योजना अलपत्र पर्ने अवस्था देशका लागि घातक बनेको उल्लेख गर्नुभयो ।
अध्यक्ष यादवले भन्नुभयो, “प्रत्यक्ष निर्वाचित राष्ट्रपति प्रणालीले शासनलाई स्थिर मात्र बनाउँदैन, जनताप्रति प्रत्यक्ष उत्तरदायी पनि बनाउँछ । शक्तिको स्रोत पार्टी होइन, जनता हुन्छन् ।” उहाँका अनुसार यस प्रणालीमा संसद् पूर्ण रूपमा समानुपातिक र समावेशी प्रतिनिधित्वमा आधारित हुनेछ, जसले मधेशी, आदिवासी जनजाति, दलित, महिला, थारू, मुस्लिम तथा सीमान्तकृत समुदायको न्यायोचित सहभागिता सुनिश्चित गर्नेछ ।
विगतमा शासन प्रणालीकै कमजोरीका कारण दर्जनौँ सरकार परिवर्तन भएको स्मरण गर्दै यादवले त्यसले विकास, सुशासन र आर्थिक सुधारमा गम्भीर असर पारेको जिकिर गर्नुभयो । चुनाव नजिकिँदै जाँदा जसपा नेपालले प्रत्यक्ष निर्वाचित कार्यकारी राष्ट्रपति प्रणालीलाई प्रमुख राजनीतिक एजेन्डाका रूपमा अघि सारेको छ ।