गोरखामा राजविद्या शक्तिपीठ स्थापना हुँदै: नमुना गुरुकुल र अन्तर्राष्ट्रिय योग केन्द्रको योजना

ईमधेश न्युज सम्वाददाता,
गोरखा २७ चैत्र ।
 ऐतिहासिक तथा धार्मिक महत्व बोकेको गोरखालाई पुनः आध्यात्मिक केन्द्रका रूपमा विकास गर्ने उद्देश्यसहित गोरखनाथ कल्याण केन्द्र नेपाल ले महत्वाकांक्षी “धर्म नीति आधारित महाअभियान” सुरु गर्ने घोषणा गरेको छ।
केन्द्रका अनुसार गोरखा नगरपालिका–९ स्थित शिखरडाँडामा निर्माणाधीन राजविद्या शक्तिपीठको करिब ८० प्रतिशत काम सम्पन्न भइसकेको छ। आगामी केही महिनाभित्र निर्माण पूरा गर्ने लक्ष्य राखिएको छ। उक्त शक्तिपीठलाई धार्मिक संरचना मात्र नभई दैविक ऊर्जा, नैतिकता र राष्ट्रशक्तिबीच सन्तुलन कायम गर्ने केन्द्रका रूपमा विकास गरिने बताइएको छ।
संरक्षक अनन्त प्रसादका अनुसार यसअघि कुशेश्वर, पालुङ, विजयपुर, भकुण्डेबेशी र राम्चेवेशी लगायत स्थानमा विभिन्न “शक्तिपीठ” स्थापना भइसकेका छन्। अब ती सबै ऊर्जा केन्द्रलाई गोरखास्थित राजविद्या शक्तिपीठमार्फत एकीकृत गर्ने योजना रहेको छ।
शक्तिपीठका पीठाधीश अच्युतकृष्ण शरणले धर्म–नीति र राज्यशक्तिबीच सन्तुलन आवश्यक रहेको बताउँदै आध्यात्मिक ऊर्जा बिना दीर्घकालीन शान्ति सम्भव नहुने धारणा राखेका छन्। उनले नेपाललाई पुनः सनातन परम्परा र योग–साधनाको केन्द्रका रूपमा स्थापित गर्ने लक्ष्य रहेको उल्लेख गरे।
यसै योजनाअन्तर्गत “नमुना गुरुकुल” स्थापना गर्ने तयारी पनि गरिएको छ। गुरुकुलमा वेद, उपनिषद्, योग र ध्यानसँगै नेतृत्व विकास, नैतिक शिक्षा र राष्ट्रचेतनामा आधारित अध्ययन गराइनेछ। उद्देश्य चरित्रवान र जिम्मेवार नागरिक उत्पादन गर्नु रहेको केन्द्रले जनाएको छ।
दीर्घकालीन योजनाअनुसार गोरखालाई अन्तर्राष्ट्रिय योग तथा आध्यात्मिक अध्ययन केन्द्रका रूपमा विकास गर्ने लक्ष्य पनि राखिएको छ। योग, ध्यान, संस्कृत र वैदिक अध्ययनमार्फत विदेशी साधक तथा अनुसन्धानकर्तालाई आकर्षित गर्ने योजना रहेको बताइएको छ।
आयोजनाले धार्मिक पर्यटन प्रवद्र्धन, रोजगारी सिर्जना तथा सांस्कृतिक परम्पराको संरक्षणमा योगदान पु¥याउने अपेक्षा गरिएको छ। केन्द्रले यो अभियानलाई समाज, राज्य र नागरिक सबैको साझा दायित्वका रूपमा अघि बढाउन आह्वान गरेको छ।