धार्मिक आस्थामाथि चोट पुगेको भन्दै जनक परियारद्वारा क्षमायाचना

ईमधेश न्यूज सम्वाददाता,
काठमाडौं, १४ जेष्ठ । 
 दलित अभियान्ता जनक परियारले हालै दिएको अभिव्यक्तिप्रति स्पष्टिकरण दिँदै आफ्नो भनाइ धार्मिक आस्थामाथि प्रहार नभई दलित समुदायले भोग्दै आएको पीडाको अभिव्यक्ति भएको बताएका छन् । बिहीबार संवाद डबलीमा आयोजित पत्रकार सम्मेलनमा उनले आफ्नो अभिव्यक्तिबाट धार्मिक भावना आहत भएको भए क्षमा मागेका हुन् ।
गत जेठ १२ गते प्रहरी हिरासतमा मृत्यु भएका श्रीकृष्ण विश्वकर्माको न्यायको माग गर्दै आयोजित कार्यक्रममा परियारले दिएको अभिव्यक्तिको सामाजिक सञ्जालमा व्यापक आलोचना भएको थियो । त्यसपछि उनले सार्वजनिक रूपमा स्पष्टिकरण दिँदै दलितमाथि हुने विभेद र अन्यायको प्रसंग उठाएको बताएका हुन् ।
परियारले “मेरो उद्देश्य कुनै धर्म वा आस्थामाथि आक्रमण गर्नु होइन, दलित समुदायले भोग्दै आएको पीडा र विभेदलाई उजागर गर्नु हो” भन्दै आफ्नो अभिव्यक्ति गलत ढंगले बुझिएको बताए । उनले अझै पनि गाउँघरमा दलित समुदायलाई धार्मिक तथा सामाजिक रूपमा विभेद गरिने अवस्था कायम रहेको उल्लेख गरे ।
उनले मठमन्दिरमा दलितलाई प्रवेश निषेध गर्ने तथा छुवाछुतजस्ता व्यवहार अझै विद्यमान रहेको भन्दै आफ्नो अभिव्यक्ति त्यही अन्यायप्रति लक्षित भएको स्पष्ट पारे । साथै, धार्मिक सहिष्णुता, सामाजिक सद्भाव र समानताको पक्षमा आफू निरन्तर उभिने प्रतिबद्धता व्यक्त गरे ।