सप्तरीमा मलखादको कालोबजारी अझै जारी

लिलाकान्त यादव 
माघ ०९ गते, सप्तरी।
सप्तरीमा मलखादको हाहाकार भएपनि डिलरहरूद्वारा कालोबजारी गर्ने जारी नै रहेको छ। 

मलखादको हाहाकार भएको बेलामा मलखाद बिक्री वितरण गर्ने वा डिलरहरूले सप्तरी बासीलाई उचित मोलमा खाद नदिइ बढी रकम असुल गरी अन्य जिल्लामा निर्यात गर्ने कालोबजारी जारी नै राखेका हुन्।
सप्तरीको हनुमाननगर कङ्कालिनी नगरपालिका वडा नं १ कोशी ब्यारेज स्थित प्र. १-००-०२ ह ४७३९ नम्बरको सिटी रिक्सामा १० बोरा युरिया मल सप्तरीबाट सुनसरीतर्फ लग्दैगरेको अवस्थामा स्थानीयहरूले पक्राउ गरी तत्काल सशस्त्र प्रहरी बेस कैम्प भारदहको मार्फत इलाका प्रहरी कार्यालय भारदहलाई बुझाएको खुलासा भएको छ। 
कोशी गाउँपालिका श्रीपुर बस्ने निरज खेरवारले भारदह बजार स्थित रमेश गुप्तासँग रु ९ सय प्रति बोरा पर्ने मल रु.१२५० को दरले १० बोरा मल खरिद गरी सुनसरी तर्फ लगिएको मल धनी खेरबारले बताए।