कृषि समस्याले थलिएको सप्तरी ः सांसद कर्णको संसदमा ध्यानाकर्षण

ईमधेश न्यूज सम्वाददाता,
काठमाडौं, २४ चैत ।
प्रतिनिधिसभाको बैठकमा राष्ट्रिय स्वतन्त्र पार्टीका सांसद खगेन्द्र कर्ण ले सप्तरीका किसानहरूले भोगिरहेका विविध समस्या संसदमा उठाएका छन्। उनले कृषिमा ठूलो सम्भावना हुँदाहुँदै पनि व्यवस्थापन र प्रभावकारी कार्यान्वयनको कमीका कारण किसानहरू पछाडि परेको बताए।
सांसद कर्णका अनुसार सप्तरीमा करिब ६७ हजार २ सय ९१ हेक्टर खेतीयोग्य जमिनमध्ये ४५ हजार २४ हेक्टर मात्र सिँचाइको पहुँचमा रहेको छ भने करिब २२ हजार २ सय ६७ हेक्टर जमिन अझै सिँचाइ सुविधाबाट वञ्चित रहेको छ। त्यस्तै सप्तरी क्षेत्र नं. १ मा १७ हजार ९ सय ६२ हेक्टर जमिनमध्ये १३ हजार ५ सय ३ हेक्टर मात्र सिँचित रहेको तथ्य उनले प्रस्तुत गरे।
उनले सिँचाइ पुगेको भनिएका क्षेत्रमा समेत आवश्यक समयमा पानी उपलब्ध नहुने समस्या रहेको उल्लेख गर्दै अधिकांश किसान अझै आकाशे पानीमा निर्भर रहन बाध्य भएको बताए। जलवायु परिवर्तनका कारण वर्षा अनियमित हुँदा कृषिमा जोखिम बढ्दै गएको उनको भनाइ छ।
यसका साथै उनले समयमै रासायनिक मल नपाइने, उन्नत बीउको अभाव तथा सहुलियत ऋणमा सीमित पहुँचका कारण उत्पादन क्षमता घटिरहेको औँल्याए।
सांसद खगेन्द्र कर्ण ले कृषि क्षेत्रको दिगो विकासका लागि सिँचाइ विस्तार, मल–बीउको समयमै उपलब्धता र किसानमैत्री नीतिको प्रभावकारी कार्यान्वयनमा सरकारको ध्यान जानुपर्ने आवश्यकता औंल्याएका छन्।