वैज्ञानिक अनुसन्धानलाई राष्ट्रिय दायित्वका रूपमा लिनुपर्छ ः उपराष्ट्रपति यादव

लिलाकान्त यादव,
काठमाडौं, २७ चैत ।
 रामसहाय प्रसाद यादव ले स्वास्थ्यसम्बन्धी वैज्ञानिक अनुसन्धानलाई केवल शैक्षिक अभ्यासमा सीमित नराखी राष्ट्रिय दायित्वका रूपमा लिनुपर्ने आवश्यकता औंल्याउनुभएको छ।
नेपाल स्वास्थ्य अनुसन्धान परिषद् द्वारा आयोजित ‘नेपालमा स्वास्थ्य तथा जनसंख्या वैज्ञानिकहरूको १२औँ राष्ट्रिय शिखर सम्मेलन’ उद्घाटन गर्दै उपराष्ट्रपति यादवले प्रमाण–आधारित नीति निर्माणका लागि अनुसन्धान अपरिहार्य रहेको बताउनुभयो।
उहाँले स्वास्थ्य अनुसन्धानले रोगका कारण, उपचारका विकल्प तथा जनसंख्या–स्वास्थ्य प्रवृत्तिबारे दीर्घकालीन दृष्टिकोण प्रदान गर्ने उल्लेख गर्नुभयो। नसर्ने रोगको बढ्दो बोझ, जलवायु परिवर्तनका असर तथा सामाजिक–आर्थिक असमानताजस्ता चुनौती समाधान गर्न अनुसन्धानलाई प्राथमिकतामा राख्नुपर्नेमा उहाँको जोड थियो।
“परम्परागत उपचार पद्धति र आधुनिक अनुसन्धानबीच सहकार्य आवश्यक छ,” उहाँले भन्नुभयो, “अनुसन्धानका नतिजा केवल प्रकाशनमा सीमित नराखी नीति र कार्यान्वयनमा प्रयोग हुनुपर्छ।”
संविधानले स्वास्थ्यलाई मौलिक हकका रूपमा सुनिश्चित गरेको स्मरण गराउँदै उहाँले वैज्ञानिक तथ्यलाई नीति निर्माणमा रूपान्तरण गर्नु आवश्यक रहेको बताउनुभयो। साथै, अनुसन्धानले स्वास्थ्यकर्मी र वैज्ञानिकहरूको क्षमता अभिवृद्धि गर्न सहयोग पुग्ने उहाँको भनाइ थियो।
उपराष्ट्रपति यादवले सम्मेलनले अनुसन्धान प्रणाली सुदृढ गर्दै तथ्याङ्कमा आधारित नीति निर्माणमा टेवा पु¥याउने विश्वास व्यक्त गर्नुभयो।