रास्वपा परित्याग गरी दर्जनौँ कार्यकर्ता जसपा नेपालमा प्रवेश

लिलाकान्त यादव,
राजविराज, १७ माघ ।
 विष्णुपुर गाउँपालिकाको अध्यक्ष पदका प्रत्यासी मनिलाल खंगसहित दर्जनौँ कार्यकर्ता शनिबार राष्ट्रिय स्वतन्त्र पार्टी (रास्वपा) परित्याग गरी जनता समाजवादी पार्टी (जसपा) नेपालमा प्रवेश गरेका छन् ।
जसपा नेपालका अध्यक्ष उपेन्द्र यादवले खंगसहित नवप्रवेशीहरूलाई माला र टीका लगाएर पार्टीमा स्वागत गर्नुभयो । तत्कालीन जमुनी मधेपुरा गाउँ विकास समितिका पूर्व अध्यक्षसमेत रहेका खंग केही दिनअघि मात्र रास्वपामा प्रवेश गरी सक्रिय थिए ।
सप्तरी क्षेत्र नम्बर ३ अन्तर्गत जमुनी मधेपुरामा आयोजित अगुवा कार्यकर्ता भेटघाट कार्यक्रममा उनीहरू पार्टीमा प्रवेश गरेको जसपा नेपालका केन्द्रीय सचिव शैलेन्द्र प्रसाद साहले जानकारी दिनुभयो ।
पार्टी प्रवेशपछि बोल्दै खंगले मधेश र मधेशी जनताको हक–अधिकारका लागि जसपा नेपाल निरन्तर लड्दै आएको र मधेशी जनताको भविष्य पनि यही पार्टीसँग जोडिएको बताउनुभयो । सप्तरी अझै विकासमा पछाडि रहेकाले विकास र समृद्धिका लागि अध्यक्ष उपेन्द्र यादवलाई भारी मत दिएर सहयोग गर्न उहाँले आमजनतासँग आग्रह गर्नुभयो ।