कांग्रेस, एमाले, माओवादी र जनमत पार्टी परित्याग गरी सयौँ नेता–कार्यकर्ता जसपा नेपालमा प्रवेश

उमेश कुमार यादव,
राजविराज, १६ माघ ।
 नेपाली कांग्रेस, नेकपा एमाले, नेकपा माओवादी केन्द्र तथा जनमत पार्टी परित्याग गरी प्रभावशाली नेताहरूको नेतृत्वमा सयौँ नेता–कार्यकर्ताहरू जनता समाजवादी पार्टी (जसपा) नेपालमा सामूहिक रूपमा प्रवेश गरेका छन् । सप्तरी क्षेत्र नम्बर ३ का प्रतिनिधिसभा उम्मेदवारसमेत रहेका जसपा नेपालका अध्यक्ष उपेन्द्र यादवले नवप्रवेशीहरूलाई खादामाला लगाएर पार्टीमा स्वागत गर्नुभयो ।
राजगढ, डाक्नेश्वरी र विष्णुपुर गाउँपालिकामा आयोजित पार्टी प्रवेश कार्यक्रममा कांग्रेस परित्याग गरी बद्री यादव, कुञ्जीलाल यादव, दिनेश यादव, बब्लु यादवलगायत सयौँ स्थानीय नेता तथा कार्यकर्ताहरू जसपा नेपालमा आवद्ध भएका छन् । राजगढ गाउँपालिका वडा नम्बर ६ मा एमालेका प्रभावशाली नेताहरू मजिद मिया कैलास र नइम मन्सुरीको नेतृत्वमा तथा वडा नम्बर १ मा एमाले नेता कामेश्वर यादवको नेतृत्वमा ठूलो संख्यामा नेता–कार्यकर्ताहरू पार्टी प्रवेश गरेका छन् ।
त्यसैगरी, विष्णुपुर गाउँपालिका वडा नम्बर ४ का दिनेश झा, सुरेश झा, छोटेलाल खंगसहितका नेताहरू, कांग्रेसका रामरतन राय र सञ्जय राय तथा जनमत पार्टीका रामसुन्दर रायले जसपा नेपालको सदस्यता लिएका छन् । डाक्नेश्वरी नगरपालिका वडा नम्बर ४ कुशहामा माओवादी केन्द्र परित्याग गरी केन्द्रीय सदस्य अच्छेलाल साह र स्थानीय नेता बच्चेलाल साहको नेतृत्वमा कार्यकर्ताहरू पनि जसपा नेपालमा प्रवेश गरेका छन् ।
अध्यक्ष यादव चुनावी अभियानमा सक्रिय भएसँगै सप्तरी क्षेत्र नम्बर ३ मा जसपा नेपालप्रति जनसमर्थन र पार्टी प्रवेशको लहर तीव्र बन्दै गएको पार्टी नेताहरूले बताएका छन् ।