सरस्वती पूजा भव्यताका साथ मनाइयो

लिलाकान्त यादव,
राजविराज, ०९ माघ ।
विद्या, विवेक, कला र संगीतकी देवी सरस्वतीको आराधना गर्दै सरस्वती पूजा आज देशभर भव्यताका साथ मनाइएको छ। माघ शुक्लपक्ष पञ्चमीका दिन मनाइने यस पर्वका अवसरमा विद्यालय, कलेज, मठ–मन्दिर तथा सार्वजनिक स्थलहरूमा विशेष पूजा–अर्चना, भजन–कीर्तन र सांस्कृतिक कार्यक्रमहरू आयोजना गरिएका थिए।
पूजाका क्रममा विद्यार्थीहरूले पुस्तक, कलम, कापी तथा वाद्ययन्त्रको पूजा गर्दै ज्ञान, सिप र सफलताको कामना गरेका छन्। अभिभावकहरूले बालबालिकाको अक्षरारम्भ गराउने परम्परा पनि उत्साहपूर्वक निभाएका छन्। देशभरका सरस्वती मन्दिरहरूमा भक्तजनको उल्लेख्य भीड देखिएको थियो भने कतिपय स्थानमा मेलासमेत लागेको छ।
सरस्वती पूजाले ज्ञान, संस्कृति र सभ्यताको संरक्षणसँगै आपसी सद्भाव, एकता र सकारात्मक सोच प्रवद्र्धन गर्ने विश्वास लिइएको छ।