बोदेबरसाईनमा जसपा नेपालको भूमि विधेयकविरुद्ध प्रदर्शन

उमेश कुमार यादव,
राजविराज, १२ भाद्र ।
जनता समाजवादी पार्टी (जसपा) नेपालले सप्तरीको बोदेबरसाईनमा भूमि विधेयकविरुद्ध विरोध प्रदर्शन गरेको छ। कार्यक्रममा सहभागी कार्यकर्ताहरुले “जसपा नेपाल जिन्दावाद”, “उपेन्द्र यादव जिन्दावाद” जस्ता नारासहित विभिन्न मागसहित विरोध जनाएका थिए।
प्रदर्शनमा “भूमि र वन बचाउ, मधेसलाई मरुभूमिकरणबाट जोगाउ”, “मधेसी विरोधी भूमि विधेयक फिर्ता गर”, “पहिचान–संघीयता विरोधी ओली सरकार मुर्दावाद”, “२२ बुँदे र ८ बुँदे सम्झौता लागू गर”, “जल, जंगल र जमिनको रक्षा गरौं, जनविरोधी भूमि विधेयक खारेज गरौं” लगायतका नारा लगाइएका थिए। सहभागीहरूले सरकारद्वारा गठित खिलराज रेग्मी र गिरिजाप्रसाद लाल आयोगका प्रतिवेदन सार्वजनिक गर्नुपर्ने मागसमेत गरेका थिए।
कार्यक्रममा जसपा नेपालका नगर उपप्रमुख रेणु साह, नगर अध्यक्ष अमरेन्द्र यादव, जिल्ला अध्यक्ष केदार यादव, वडा नं–१० का वडा अध्यक्ष सुनित कुमार यादव, सदस्य लक्ष्मण यादव, मुक्ती यादव, बबि सिंह लगायतका नेताहरूको सहभागिता रहेको थियो। उनीहरूले मधेसी, थारु, आदिवासी र जनजाति समुदायबीच एकता कायम गर्दै सरकारको मधेस विरोधी नीतिविरुद्ध निरन्तर आन्दोलन गरिने चेतावनी दिएका छन्।