उपराष्ट्रपति यादवद्वारा हरितालिका तीजका अवसरमा शुभकामना

लिलाकान्त यादव,
काठमाडौं, १0 भाद्र ।
उपराष्ट्रपति रामसहाय प्रसाद यादवले हरितालिका तीज, २०८२ को अवसरमा सम्पूर्ण नेपाली दिदीबहिनी तथा दाजुभाइहरूलाई सुख, शान्ति, समृद्धि र प्रगतिका लागि शुभकामना व्यक्त गरेका छन् ।
उनले तीजलाई धार्मिक आस्था, सांस्कृतिक गौरव र पारिवारिक प्रेमको अनुपम प्रतीकका रूपमा व्याख्या गर्दै नेपाली समाजलाई एकता, सहिष्णुता र आपसी सद्भावतर्फ उन्मुख गराउने पर्व भएको उल्लेख गरे ।
यादवले महिलाले श्रद्धा, समर्पण र उत्साहका साथ मनाउने तीज पर्व केवल धार्मिक अनुष्ठान मात्र नभई श्रद्धा, प्रेम, आत्मबल र सामाजिक चेतनाको उत्सव भएको बताए । उनले विवाहित महिलाले पतिको दीर्घायु र समृद्धिको कामना गर्ने तथा अविवाहित कन्याले योग्य वरको कामना गर्ने परम्पराले पारिवारिक तथा सामाजिक सम्बन्धलाई अझ प्रगाढ बनाउने बताए ।
परम्परागत गीत–संगीत, ‘दर’ खाने संस्कार र छोरीचेलीलाई माइती बोलाउने प्रथाले सामाजिक आत्मीयता बलियो बनाएको उनले स्मरण गरे । उपराष्ट्रपतिले सबै नेपालीले तीजलाई मौलिकता, मर्यादा र श्रद्धासहित मनाउँदै समाज र राष्ट्रलाई समृद्ध बनाउन योगदान पुगोस् भन्ने शुभकामना व्यक्त गरेका छन् ।