नेपाल–भियतनाम उपराष्ट्रपतिहरूबीच द्विपक्षीय भेटवार्ता

लिलाकान्त यादव,
काठमाडौं, ०९ भाद्र ।
नेपालका उपराष्ट्रपति रामसहाय प्रसाद यादव र औपचारिक भ्रमणमा नेपाल आइरहेकी भियतनामकी उपराष्ट्रपति वो भो थी आन्ह सुआनबीच आइतबार काठमाडौंमा शिष्टाचार भेटवार्ता भएको छ।
उपराष्ट्रपतिहरूबीच ‘वन–टु–वन’ वार्ता र उच्चस्तरीय प्रतिनिधिमण्डलसहितको भेटमा द्विपक्षीय सम्बन्ध, आर्थिक सहकार्य, व्यापार–लगानी, पर्यटन, सांस्कृतिक आदान–प्रदान, जलवायु परिवर्तन तथा क्षेत्रीय–बहुपक्षीय संलग्नता जस्ता विषयमा छलफल भएको थियो।
उपराष्ट्रपति यादवले नेपाल र भियतनामबीच सन् १९७५ मा कूटनीतिक सम्बन्ध स्थापना भएको र त्यसयता मित्रता, सद्भाव र समझदारीका आधारमा सम्बन्ध सुदृढ हुँदै आएको बताए। उनले भियतनामको तीव्र आर्थिक विकास नेपालका लागि प्रेरणादायी रहेको उल्लेख गर्दै व्यापार, पर्यटन, लगानी र प्रविधि हस्तान्तरणका क्षेत्रमा सहकार्यको अपार सम्भावना रहेकोमा जोड दिए। साथै, लुम्बिनीले दुई देशबीचको सांस्कृतिक सम्बन्धलाई थप गाढा बनाएको उल्लेख गरे।
भियतनामी उपराष्ट्रपति सुआनले नेपाल र भियतनाम साझा उद्देश्यका नजिकका मित्र राष्ट्र भएको बताउँदै जलवायु परिवर्तनबारे नेपालको प्रतिबद्धताबाट आफू प्रभावित भएको भनिन्। उनले नेपालमा लगानीको वातावरण अनुकूल रहेको र कृषि, सामाजिक तथा आर्थिक क्षेत्रमा सहकार्यको ठूलो सम्भावना रहेको उल्लेख गर्दै उपराष्ट्रपति यादवलाई भियतनाम भ्रमणको निम्तो दिइन्।
यस अवसरमा उपराष्ट्रपति यादवले भियतनामी समकक्षी र प्रतिनिधिमण्डलको सम्मानमा दिवा भोजको आयोजना गरे। नेपाल–भियतनाम कूटनीतिक सम्बन्ध स्थापनाको ५०औं वार्षिकोत्सवका अवसरमा भएको यो भ्रमणलाई ऐतिहासिक अवसरका रूपमा लिइएको छ।