महाशिवरात्रि र सेना दिवसले धार्मिक आस्था र राष्ट्रिय एकतालाई सुदृढ बनाओस्: उपराष्ट्रपति यादव

लिलाकान्त यादव,
काठमाडौं, ०३ फाल्गुन ।
 रामसहाय प्रसाद यादवले महाशिवरात्रि तथा सेना दिवस २०८२ को अवसरमा स्वदेश तथा विदेशमा रहेका सम्पूर्ण नेपाली दिदीबहिनी तथा दाजुभाइहरूमा सुख, शान्ति, समृद्धि, सुस्वास्थ्य र उत्तरोत्तर प्रगतिका लागि हार्दिक शुभकामना व्यक्त गर्नुभएको छ।
उपराष्ट्रपति यादवले शुभकामना सन्देशमार्फत हिन्दू धर्मावलम्बीहरूको महान् पर्व महाशिवरात्रिले धार्मिक आस्था, सामाजिक एकता र सांस्कृतिक गौरवलाई सुदृढ बनाउँदै आएको उल्लेख गर्नुभएको छ। शिव उपासना, उपवास र ध्यानले आत्म–शुद्धि, नैतिकता र आध्यात्मिक उन्नतिलाई प्रेरित गर्दै समाजमा सद्भाव, सहयोग र मेलमिलापको भावना अभिवृद्धि गर्ने विश्वास व्यक्त गर्नुभएको छ। काम, क्रोध, लोभ, मोह र अहंकार त्यागी सत्य, धर्म, शान्ति र प्रेमको मार्गमा अग्रसर हुन पर्वले सबैलाई प्रेरित गरोस् भन्ने उहाँको कामना छ।
यसै अवसरमा मनाइने सेना दिवसले नेपाली सेनाको साहस, अनुशासन र समर्पणलाई स्मरण गर्ने अवसर प्रदान गर्ने उल्लेख गर्दै राष्ट्रको सुरक्षा, सम्मान र विपद्का बेला अग्रपंक्तिमा रहेर सेवा गर्ने सैनिकहरूप्रति गर्व व्यक्त गर्नुभएको छ। आधुनिक प्रविधि र दक्षतायुक्त सेनाको निर्माण आजको आवश्यकता भएको बताउँदै राष्ट्रिय हित सुदृढ बनाउन सबै एकताबद्ध हुनुपर्नेमा जोड दिनुभएको छ।