गौर डुबानको जोखिम बढ्ने चिन्ता—बाँध मर्मतका नाममा उच्चाइ बढाउने र साइफन बन्द गर्ने काम तीव्र, प्रशासन मौन

ईमधेश न्यूज सम्वाददाता,
रौतहट, २७ माघ ।
रौतहट – गौर भन्सार कार्यालयदेखि पूर्वतर्फ बाँध मर्मत तथा सम्भारको नाममा उच्चाइ थप्ने र साइफन बन्द गर्ने काम तीव्र रूपमा अघि बढाइएको भन्दै स्थानीय बासिन्दाले गम्भीर आपत्ति जनाएका छन्। हरेक वर्ष वर्षायाममा गौर डुबानमा पर्ने मुख्य कारण यही बाँध रहेको उनीहरूको दाबी छ।
स्थानीयका अनुसार दशगजा क्षेत्र आसपास भौतिक संरचना निर्माण गर्न नपाइने अन्तर्राष्ट्रिय प्रावधान रहे पनि दशगजादेखि करिब ३०–४० मिटर दूरीमा बाँध स्तरोन्नति भइरहेको छ। “मर्मतको बहानामा बाँध अग्लो बनाइँदैछ र साइफनसमेत बन्द गरिँदैछ। यसले पानीको निकास अवरुद्ध भई फेरि गौर डुबानमा पर्ने निश्चित छ,” समाजसेवी महमद अजादले बताए।
वडा अध्यक्ष, नगर प्रमुख, जिल्ला प्रशासन कार्यालय र सशस्त्र प्रहरी बललगायत निकायलाई जानकारी गराउँदा पनि कुनै पहल नभएको स्थानीयको गुनासो छ। सरोकारवाला निकायको आधिकारिक प्रतिक्रिया आउन बाँकी छ। स्थानीयले तत्काल अनुगमन गरी निर्माण कार्य रोक्न र दीर्घकालीन समाधान खोज्न माग गरेका छन्।