सप्तरी–३ मा उपेन्द्र यादवको घरदैलो अभियान सुरु

उमेश कुमार यादव,
राजविराज, ०४ फाल्गुन ।
 जनता समाजवादी पार्टी, नेपालका अध्यक्ष उपेन्द्र यादवले आगामी फागुन २१ गते हुने प्रतिनिधि सभा सदस्य निर्वाचनलाई लक्षित गर्दै सोमबारदेखि औपचारिक रूपमा घरदैलो अभियान सुरु गरेका छन्।
सप्तरी क्षेत्र नम्बर ३ बाट उम्मेदवार बनेका यादवले विकासका दृष्टिले पछाडि परेको मानिने डाक्नेश्वरी नगरपालिकाबाट अभियान प्रारम्भ गरेका हुन्। पार्टीका केन्द्रीय सचिव तथा क्षेत्र निर्वाचन परिचालन समितिका संयोजक शैलेन्द्र प्रसाद साहका अनुसार वडा नम्बर ७ को मझौरा, ब्रहम्पुर, सिंगिया तथा वडा नम्बर १ को कबिलासा, मधुबनीलगायतका गाउँहरूमा उनले घरदैलो गरेका छन्।
घरदैलोका क्रममा अध्यक्ष यादवले आम मतदातासँग भेटघाट गर्दै संविधान संशोधनमार्फत बाँकी अधिकार सुनिश्चित गर्ने र क्षेत्रीय विकासलाई तीव्रता दिने प्रतिबद्धता व्यक्त गरेका छन्। उनले समृद्धि र समान अधिकारका लागि आफू र पार्टीलाई मतदान गर्न आग्रह गरेका छन्।
अभियानमा केन्द्रीय नेता तथा पूर्वमन्त्री रेणु कुमारी यादव, केन्द्रीय सचिव शैलेन्द्र प्रसाद साह, केन्द्रीय सदस्य तथा मधेश प्रदेशसभाका पूर्व सदस्य बिदेश्वर प्रसाद यादव (बिक्की) लगायतका नेता सहभागी भएका छन्।
सप्तरी क्षेत्र नम्बर ३ अन्तर्गत विष्णुपुर, रुपनी, राजगढ गाउँपालिका तथा शम्भुनाथ र डाक्नेश्वरी नगरपालिका समेटिएका छन्। उक्त क्षेत्रमा कुल १ लाख ११ हजार ८ सय ७१ मतदाता रहेका छन्।