हुलाकी सडक ३० वर्षसम्म अधुरै रहनुमा कांग्रेस–कम्युनिष्ट जिम्मेवार: उपेन्द्र यादव

शम्भु यादव,
राजविराज, २८ माघ ।
 जनता समाजवादी पार्टी (जसपा) नेपालका अध्यक्ष उपेन्द्र यादवले मधेशको ‘लाइफलाइन’का रूपमा रहेको हुलाकी सडक तीन दशकसम्म पनि निर्माण सम्पन्न हुन नसक्नुमा कांग्रेस र कम्युनिष्ट सरकार जिम्मेवार रहेको आरोप लगाएका छन्।
राजगढ गाउँपालिका–३ नर्घोमा मंगलबार आयोजित चुनावी छलफल तथा भेटघाट कार्यक्रममा बोल्दै उनले रणनीतिक रूपमा मधेशलाई पछाडि पार्ने काम भएको दाबी गरे। “मदन भण्डारी द्रुत मार्ग छोटो समयमै बन्छ, तर हुलाकी सडक ३० वर्षमा पनि अधुरै छ,” उनले भने, “यसको जिम्मेवारी कांग्रेस र कम्युनिष्ट सरकारले लिनुपर्छ।” भारत सरकारबाट प्राप्त रकम हुँदाहुँदै पनि सडक निर्माण अलपत्र पारिएको उनको आरोप थियो।
अध्यक्ष यादवले सुनकोसी–मरिन डाइभर्सन र बाराको अन्तर्राष्ट्रिय विमानस्थल जस्ता परियोजना पनि रोकिएको उल्लेख गर्दै मधेशका विकास आयोजना पूरा हुन नदिएको बताए। अधिकार र विकासका लागि मधेशकै शक्तिलाई बलियो बनाउनुपर्नेमा उनले जोड दिए।
कार्यक्रममा रेणु कुमारी यादव, शैलेन्द्र प्रसाद साह लगायतका नेताहरूको उपस्थिति रहेको थियो।