सप्तरीमा धूमधामका साथ छठ पर्व सम्पन्न

लीलाकान्त यादव,
राजविराज, ११ कार्तिक ।
 आस्था, श्रद्धा र अनुशासनको प्रतीक छठ पर्व आज सप्तरीमा धूमधामका साथ सम्पन्न भएको छ। आज बिहान हजारौं व्रतालुहरू जिल्लाका विभिन्न नदी, तलाउ र पोखरीहरूमा भेला भई उदाउँदो सूर्यलाई अघ्र्य अर्पण गर्दै व्रत सम्पन्न गरे।
चार दिनसम्म मनाइने यस पर्वमा महिलाहरूले परिवारको सुख, शान्ति र समृद्धिको कामना गर्दै निर्जला व्रत बसेका थिए। सप्तरीको राजविराजस्थित भगवती पोखरी, हनुमाननगरको महासेठ पोखरी,कोशी बैरेज, सखडाको छिन्नमस्ता पोखरी, भारदहको कंकालिनी मंदिरको पोखरी, कञ्चनरुप, रुपनी, अग्निसाइर कृष्णासावरण, बोदेबरसाइन, तिलाठी कोईलाडी लगायतका ठाउँका छठ घाटहरूमा व्रती र श्रद्धालुहरूको ठूलो भीड लागेका थिए ।
सुरक्षा व्यवस्था कडा पारिएको र स्थानीय प्रशासनले घाटहरूमा विशेष निगरानी गरेको जिल्ला प्रशासन कार्यालयले जनाएको छ। सूर्यदेव र छठी मैयाप्रति कृतज्ञता व्यक्त गर्दै सम्पन्न भएको यो पर्वले धार्मिक सहिष्णुता र सामाजिक एकताको सन्देश दिएको छ।