पत्रकार मनोज माझीमाथि जनप्रतिनिधिको नेतृत्वमा आक्रमण, मोबाइलसमेत तोडफोड

ईमधेश न्युज सम्वाददाता,
राजविराज, २७ असोज ।
 नेपाल पत्रकार महासंघका केन्द्रीय परिषद् सदस्य तथा राजधानी दैनिक र प्राइम टेलिभिजनका सप्तरी संवाददाता मनोज माझीमाथि हातपात भएको छ । शम्भुनाथ नगरपालिका–११ मा सोमबार समाचार संकलनका क्रममा माझीमाथि आक्रमण भएको हो ।
पीडित पत्रकार माझीका अनुसार वडा अध्यक्ष राजा कुमार साहको नेतृत्वमा आएको समूहले समाचार संकलनका क्रममा उनीमाथि शारीरिक आक्रमण गरेको र मोबाइल फोनसमेत तोडफोड गरेको बताएका छन् ।
“म जग्गा घेराबार र भत्काइएको दृश्य कैद गर्दै थिएँ, पत्रकारको परिचय र प्रेस कार्ड देखाउँदा पनि सुनेनन्,” माझीले भने, “अदालतको फैसला कार्यान्वयन भइरहेको विषयमा समाचार संकलन गर्न गएका बेला नै जनप्रतिनिधिकै नेतृत्वमा आक्रमण हुने कुरा सोचेको थिइनँ।”
उनले आक्रोश व्यक्त गर्दै भने, “प्रहरीकै सामुन्ने मेरो माथि हातपात भयो, तर प्रहरीले मौन भूमिका खेल्यो, यो पत्रकारमाथिको असह्य अपमान हो।”
घटनापछि पत्रकार महासंघ सप्तरीले घटनाको तत्काल छानबिन र दोषीमाथि कारबाहीको माग गरेको छ । महासंघका पदाधिकारीहरूले पत्रकारमाथि आक्रमण प्रेस स्वतन्त्रतामाथिको प्रत्यक्ष प्रहार भएको भन्दै दोषी जनप्रतिनिधिलाई कानुनी दायरामा ल्याउन प्रशासनसँग माग गरेका छन् ।
यस घटनाले पुनः पत्रकार सुरक्षाको सवाल र राज्य संयन्त्रको निष्क्रियतामाथि गम्भीर प्रश्न उठाएको छ ।