मधेस न्युजको कार्यालय राजविराजमा चोरी

राजविराज,१६ पौष ।
सप्तरीको राजविराज नगरपालिका वडा नं. २, राजदेवी टोलमा रहेको मधेस न्युज पत्रिकाको कार्यालयमा गएराति चोरी भएको छ।  कार्यालयको मुख्य गेट र भित्री दुई कोठाका ताल्चा तोडेर कम्प्युटर, ल्यापटपसहितका सामग्री चोरी भएका छन्।
चोरीबारे छिमेकी पंचम सिंहकी श्रीमतीले मूल ढोकाको ताल्चा फुटेको देखेपछि व्यवस्थापक उमेश कुमार यादवलाई जानकारी दिएकी  थिइन । कार्यालय भवन मधेस प्रदेशका मुख्यमन्त्री सतिश सिंहको घरनजिक र जनमत पार्टीका अध्यक्ष मा.डा. सीके राउतको घरसगैं टासिएकै रहेको छ।
घटनाको जानकारी गराउदा  जिल्ला प्रहरी कार्यालय सप्तरीको टोली, नायब प्रहरी उपरीक्षकको नेतृत्वमा, घटनास्थलमा पुगेर अनुसन्धानमा जुटेको छ। चोरीमा संलग्नको पहिचान र समात्न प्रहरी सक्रिय रहेको जानकारी व्यवस्थापक यादवले दिएका छन्।
कार्यालयका महत्वपूर्ण सामग्री चोरी भएपछि स्थानीय सञ्चारकर्मीहरूमा चिन्ता छाएको छ। चोरीको घटना विस्तारमा अनुसन्धान भइरहेकाले थप विवरण प्रतीक्षा गरिँदैछ।