भक्तपुरमा बाँसुरी बनाउने कार्यशाला आयोजना हुँदै

ईमधेश न्यूज सम्वाददाता,
काठमाडौं, ११ चैत्र ।
 बाँसुरी वादन र निर्माणमा रुचि राख्नेहरूका लागि भक्तपुरमा विशेष ‘बाँसुरी बनाउने कार्यशाला’ आयोजना हुने भएको छ। Hungry Musician Terrace र Soundbuzz Audio Lab को सहकार्यमा चैत १७ गते मंगलबार कार्यशाला हुन लागेको हो।
भक्तपुरको सुकुलढोकास्थित साउन्डबज अडियो ल्याबमा दिउँसो १ बजेबाट सुरु हुने कार्यशालामा सहभागीहरूलाई बाँसुरी निर्माणसम्बन्धी व्यावहारिक तथा सैद्धान्तिक ज्ञान प्रदान गरिनेछ। कार्यक्रममा बाँस र पीभीसी पाइप प्रयोग गरेर बाँसुरी बनाउने विधि सिकाइनेछ भने स्वर मिलाउने (ट्युनिङ) प्रविधिबारे पनि जानकारी दिइनेछ। साथै हावाबाट बज्ने वाद्ययन्त्रका आधारभूत सिद्धान्तहरूबारे समेत प्रशिक्षण दिइने आयोजकले जनाएको छ।
कार्यशालाका मुख्य प्रशिक्षकका रूपमा अमन माली रहनेछन्। शास्त्रीय, लोक तथा ज्याज फ्युजन संगीतमा दखल राख्ने उनी The Khwop Band र कुमार सागर सँगको सहकार्यका लागि परिचित छन्।
कार्यशालामा सहभागी हुन प्रति व्यक्ति १,५०० रुपैयाँ शुल्क तोकिएको छ। थप जानकारी वा नाम दर्ताका लागि ९८४३३१७७५८ मा सम्पर्क गर्न सकिने आयोजकले बताएका छन्।