नवनिर्वाचित सांसदद्वारा शपथ, प्रतिनिधिसभा औपचारिक रूपमा सक्रिय

ईमधेश न्यूज सम्वाददाता,
काठमाडौं, १२ चैत्र ।
 प्रतिनिधिसभाका नवनिर्वाचित सांसदहरूले पद तथा गोपनीयताको शपथ लिएका छन्। अर्जुननरसिंह केसी ले बुधबार सिंहदरबार स्थित संसद् भवनमा आयोजित समारोहमा सांसदहरूलाई शपथ खुवाएका हुन्।
यसअघि केसीले रामचन्द्र पौडेल समक्ष शीतल निवास मा पद तथा गोपनीयताको शपथ लिएका थिए। संवैधानिक व्यवस्थाअनुसार सभामुख चयन नभएसम्म ज्येष्ठ सदस्यले नै संसद् बैठकको अध्यक्षता गर्ने व्यवस्था छ।
२७५ सदस्यीय प्रतिनिधिसभामा राष्ट्रिय स्वतन्त्र पार्टी १८२ सिटसहित पहिलो दल बनेको छ भने नेपाली कांग्रेस ३८ सिटसहित दोस्रो र नेपाल कम्युनिष्ट पार्टी (एमाले) २५ सिटसहित तेस्रो स्थानमा रहेका छन्। नेपाल कम्युनिष्ट पार्टी १७ सिटसहित चौथो, श्रम संस्कृति पार्टी ७ सिटसहित पाँचौँ र राष्ट्रिय प्रजातन्त्र पार्टी ५ सिटसहित छैटौँ दल बनेका छन्।
शपथ समारोह सिंहदरबारस्थित नवनिर्मित बहुउद्देश्यीय हलमा सम्पन्न भएको हो। सङ्घीय संसद् सचिवालयका अनुसार ४७ जना सांसदले नेपालीबाहेक अन्य भाषामा शपथ लिएका छन्, जसमध्ये १७ जनाले मैथिली भाषामा शपथ लिएका छन्।
संविधानको धारा ९९ तथा धारा ९१(५) र प्रतिनिधिसभा सदस्य निर्वाचन ऐन, २०७४ अनुसार शपथ लिने व्यवस्था गरिएको हो। सांसदहरू आ–आफ्नो सांस्कृतिक पहिचान झल्किने पोसाकमा उपस्थित भई शपथ ग्रहण गरेका थिए।