इन्जिनियर बालेन्द्र शाह प्रधानमन्त्री बनेपछि नेपाल इको प्यानलको बधाई

ईमधेश न्यूज सम्वाददाता,
काठमाडौं, १४ चैत्र ।
 नेपाल इको प्यानल कम्पनीले इन्जिनियर बालेन्द्र शाह नेपालको प्रधानमन्त्री नियुक्त भएकोमा बधाई तथा शुभकामना व्यक्त गरेको छ । कम्पनीका प्रमुख कार्यकारी अधिकृत (सीईओ) इन्जिनियर कृष्णभक्त दुवालले सामाजिक सञ्जालमार्फत प्रतिक्रिया जनाउँदै इन्जिनियरिङ पृष्ठभूमिका व्यक्तिहरू देशको नेतृत्वमा पुग्नु गौरवको विषय भएको बताएका छन् ।
दुवालले नयाँ पुस्ताले नेतृत्व सम्हालेको वर्तमान अवस्थालाई सकारात्मक संकेतका रूपमा लिँदै देश निर्माणको जिम्मेवारी अब यही पुस्तामा आएको उल्लेख गरेका छन् । “इन्जिनियरिङ अध्ययन गरेका विद्यार्थीहरू आज प्रधानमन्त्री र मन्त्री बन्नु गर्वको विषय हो, अब देश निर्माणको जिम्मेवारी हाम्रो पुस्तामाथि आएको छ,” उनले लेखेका छन् ।
उनले नयाँ नेतृत्वले देशलाई सही दिशा दिन सक्ने विश्वास व्यक्त गर्दै विशेषगरी अन्तर्राष्ट्रिय सम्बन्ध र भू–राजनीतिक सन्तुलन कायम गर्दै अगाडि बढ्नुपर्नेमा जोड दिएका छन् । साथै, सक्षम, इमानदार र दूरदर्शी नेतृत्वमार्फत समृद्ध नेपालको आधार तयार गर्नुपर्ने धारणा उनले राखेका छन् ।
नेपाल इको प्यानल आधुनिक निर्माण सामाग्री उत्पादन गर्ने कम्पनी हो, जसका उत्पादनहरू स्थायी तथा अस्थायी संरचनामा भित्री तथा बाहिरी पर्खाल (पार्टिशन) निर्माणमा प्रयोग हुँदै आएका छन् । कम्पनीले युवा नेतृत्वप्रति विश्वास व्यक्त गर्दै देश विकासमा सहकार्य गर्न तयार रहेको जनाएको छ ।