ज्येष्ठ सदस्य केसीद्वारा शपथ, अब सांसदहरूलाई शपथ गराउने

ईमधेश न्यूज सम्वाददाता,
काठमाडौं, ११ चैत्र ।
 प्रतिनिधिसभाका ज्येष्ठ सदस्य अर्जुननरसिंह केसी ले पद तथा गोपनीयताको शपथ लिएका छन्। आज शीतल निवास मा आयोजित समारोहमा रामचन्द्र पौडेल ले उनलाई शपथ ग्रहण गराएका हुन्।
गत फागुन २१ गते सम्पन्न प्रतिनिधिसभा सदस्य निर्वाचनमा नेपाली कांग्रेस का केसी समानुपातिक निर्वाचन प्रणालीमार्फत निर्वाचित भएका थिए। ७८ वर्षीय केसी प्रतिनिधिसभाका ज्येष्ठ सदस्यका रूपमा जिम्मेवारी सम्हालिरहेका छन्।
राष्ट्रपतिबाट शपथ लिएपछि उनले चैत १२ गते हुने समारोहमा प्रतिनिधिसभाका अन्य सदस्यहरूलाई शपथ गराउनेछन्। सभामुख चयन नभएसम्म केसीले नै प्रतिनिधिसभा बैठकको अध्यक्षता गर्ने संवैधानिक व्यवस्था छ।
प्रतिनिधिसभा निर्वाचनअन्तर्गत प्रत्यक्ष प्रणालीबाट १६५ र समानुपातिक प्रणालीबाट ११० जना सांसद निर्वाचित भएका छन्।