सप्तरीमा विभिन्न मुद्दाका १४ जना प्रतिवादी पक्राउ

लिलाकान्त यादव,
राजविराज, २६ बैशाख ।
 सप्तरी प्रहरीले विभिन्न मुद्दामा फरार तथा अनुसन्धानमा रहेका १४ जना प्रतिवादीलाई पक्राउ गरेको छ । पक्राउ परेकामध्ये अभद्र व्यवहार मुद्दाका तीन, मुद्रासम्बन्धी कसुरका दुई, अदालतबाट सजाय तोकिएका विभिन्न मुद्दाका नौ जना रहेका छन् ।
प्रहरी प्रवक्ता प्रहरी नायब उपरीक्षक डम्बरबहादुर पुरीका अनुसार राजविराज नगरपालिका–९ क्षेत्रमा प्रहरीसँग अभद्र व्यवहार गरेको आरोपमा हनुमाननगर कङ्कालिनी नगरपालिका–१ निवासी २१ वर्षीय आदित्य पाण्डे पक्राउ परेका छन् । त्यस्तै नेता चोक क्षेत्रमा होहल्ला गरिरहेका विष्णुपुर गाउँपालिका–६ का १२ वर्षीय संजिव साह र सुनसरी बरजू गाउँपालिका–५ का २६ वर्षीय शिवनारायण पण्डितलाई पनि अभद्र व्यवहार मुद्दामा पक्राउ गरिएको प्रहरीले जनाएको छ ।
यसैगरी हनुमाननगर कङ्कालिनी नगरपालिका–१४ मल्हनिया क्षेत्रमा चेकजाँचका क्रममा भारतबाट नेपाल आउँदै गरेका दुई युवाको साथबाट एक हजार दरका सात थान नेपाली जाली नोट बरामद भएपछि विवेककुमार पण्डित र सचिनकुमार यादव पक्राउ परेका छन् ।
फैसला कार्यान्वयन अन्तर्गत कुटपिट, लुटपाट, मोबाइल चोरी, लागुऔषध तथा आपराधिक उपद्रव मुद्दामा फरार रहेका नौ जनालाई समेत प्रहरीले पक्राउ गरी जिल्ला अदालत सप्तरीमा पेश गरेको छ । अभद्र व्यवहार र मुद्रासम्बन्धी कसुरमा पक्राउ परेका पाँच जनामाथि थप अनुसन्धान भइरहेको प्रहरीले जनाएको छ ।