नेपाल मेडिकल कलेजद्वारा हजयात्रीलाई स्वास्थ्य सामग्री सहयोग

ईमधेश न्यूज सम्वाददाता,
काठमाडौं, २४ बैशाख ।
नेपाल मेडिकल कलेजले साउदी अरबको मक्का–मदिनामा हज यात्रामा जाने नेपाली मुस्लिम हजयात्रीका लागि आपत्कालीन स्वास्थ्य सामग्री उपलब्ध गराएको छ । कलेजले नेपाल हज समितिका पदाधिकारीमार्फत औषधि तथा आवश्यक स्वास्थ्य सामग्री हस्तान्तरण गरेको हो ।
बुधबार आयोजित कार्यक्रममा कलेजका अध्यक्ष जैनुद्धिन अन्सारीले हज समितिका अध्यक्ष मोख्तार अहमदलाई सामग्री हस्तान्तरण गर्दै हजयात्रीहरूको सफल र सुरक्षित यात्राको शुभकामना व्यक्त गर्नुभयो । उहाँले हज मुस्लिम समुदायका लागि अत्यन्त पवित्र धार्मिक कार्य भएको उल्लेख गर्दै आवश्यक सहकार्य र समन्वयका लागि आफूहरू तयार रहेको बताउनुभयो ।
हज समितिका अध्यक्ष मोख्तार अहमदले गत वर्ष नेपाली हजयात्रीहरूको व्यवस्थापन प्रभावकारी भएको भन्दै साउदी सरकारले नेपाली टोलीलाई सम्मानका लागि छनोट गरेको जानकारी दिनुभयो । यस वर्ष पनि यात्रुहरूलाई कुनै समस्या नपर्ने गरी आवश्यक तयारी गरिएको उहाँको भनाइ थियो ।
साउदी अरब सरकारले नेपाललाई प्रत्येक वर्ष १२०० जनासम्म हजयात्री पठाउने कोटा उपलब्ध गराउँदै आएको छ । समितिका अनुसार यस वर्ष हज यात्रा आगामी शनिबारबाट सुरु हुनेछ । आवेदन दिएका १२ सय ५६ जनामध्ये प्राथमिकताका आधारमा यात्रु छनोट गरिएको जनाइएको छ ।