उपराष्ट्रपति यादव र नर्वेली राजदूतबीच शिष्टाचार भेट

लिलाकान्त यादव,
काठमाडौं, २३ वैशाख ।
 सम्माननीय उपराष्ट्रपति रामसहाय प्रसाद यादवसँग नेपालका लागि नर्वेकी राजदूत ड्याग्नी मियोसले लैनचौरस्थित उपराष्ट्रपतिको कार्यालयमा शिष्टाचार भेटवार्ता गर्नुभएको छ ।
भेटमा नेपाल–नर्वेबीचको द्विपक्षीय सम्बन्धका विविध पक्षमा छलफल भएको थियो । उपराष्ट्रपति यादवले सन् १९७३ देखि कायम कूटनीतिक सम्बन्धले दुई देशबीच मैत्रीपूर्ण सहकार्यलाई मजबुत बनाएको उल्लेख गर्नुभयो । लोकतन्त्र, मानवअधिकार र सामाजिक न्याय दुवै देशका साझा मूल्य भएको उहाँको भनाइ थियो ।
उहाँले नवीकरणीय ऊर्जा, शिक्षा र सुशासन क्षेत्रमा नर्वेको सहयोग नेपालका लागि उपयोगी रहेको बताउँदै आगामी दिनमा सहकार्य थप विस्तार हुने विश्वास व्यक्त गर्नुभयो । साथै, बहुपक्षीय मञ्चहरूमा नर्वेले खेलेको भूमिकाको प्रशंसा गर्दै नेपाल–नर्वे सम्बन्ध अझ सुदृढ हुने अपेक्षा गर्नुभयो ।
उपराष्ट्रपति यादवले मे १७ मा मनाइने नर्वेको संविधान दिवसका अवसरमा नर्वेली जनताको सुख, शान्ति र समृद्धिको कामना पनि व्यक्त गर्नुभयो ।
राजदूत मियोसले शिक्षा, ऊर्जा, सुशासन तथा मानवअधिकारका क्षेत्रमा सहकार्य विस्तार गर्न नर्वे इच्छुक रहेको बताउँदै नेपाल सरकारको विकास प्राथमिकतामा सहयोग गर्ने प्रतिबद्धता जनाउनुभयो । साथै, अन्तर्राष्ट्रिय मञ्चहरूमा समेत सहकार्य बढाउने सम्भावना औंल्याउनुभयो ।