उपराष्ट्रपति यादवसँग ईयू राजदूतको शिष्टाचार भेट

लिलाकान्त यादव,
काठमाडौं, २१ बैशाख ।
 सम्माननीय उपराष्ट्रपति रामसहाय प्रसाद यादवसँग युरोपेली संघका राजदूत भेरोनिक लोरेन्जोले सोमबार लैनचौरस्थित उपराष्ट्रपतिको कार्यालयमा शिष्टाचार भेटवार्ता गर्नुभएको छ ।
भेटमा द्विपक्षीय सम्बन्धका विविध आयाममा छलफल भएको थियो । उपराष्ट्रपति यादवले सन् १९७४ देखि कायम नेपाल–ईयू सम्बन्धप्रति सन्तोष व्यक्त गर्दै साझेदारीलाई नेपालले उच्च महत्व दिएको बताउनुभयो । स्वास्थ्य, शिक्षा, ऊर्जा तथा ग्रामीण विकासका क्षेत्रमा ईयूको सहयोग उपयोगी भएको उल्लेख गर्दै उहाँले आगामी दिनमा उत्पादनशील क्षेत्रमा सहयोग विस्तार हुने विश्वास व्यक्त गर्नुभयो ।
विशेषगरी कर्णाली प्रदेशमा ईयू समर्थित परियोजनाबाट दुर्गम क्षेत्रका नागरिक लाभान्वित भएको उल्लेख गर्दै उहाँले लोकतन्त्र, स्वतन्त्रता र बहुपक्षीयताजस्ता साझा मूल्यमा दुवै पक्षको प्रतिबद्धता रहेको बताउनुभयो । जलवायु परिवर्तन र महामारीजस्ता विश्वव्यापी चुनौती सामना गर्न सहकार्य आवश्यक रहेकोमा पनि उहाँले जोड दिनुभयो ।
उपराष्ट्रपति यादवले सरकारको १०० बुँदे कार्ययोजनामार्फत सुशासन, पारदर्शिता र आर्थिक वृद्धिमा जोड दिइएको जानकारी दिनुभयो । पर्यटन, जलविद्युत्, पूर्वाधार र सूचना प्रविधि क्षेत्रमा ईयू सहयोग अपेक्षित रहेको उहाँको भनाइ थियो ।
राजदूत लोरेन्जोले नेपाल–ईयू सम्बन्ध सुदृढ बनाउन निरन्तर सहयोग रहने बताउँदै मे २५–२६ मा २२ युरोपेली मुलुकका राजदूतहरूको नेपाल भ्रमण हुने जानकारी दिनुभयो ।