सुकुम्बासी बस्तीमा डोजर चलाउनु अस्वीकार्य: इन्चार्ज खड्का

ईमधेश न्यूज सम्वाददाता,
काठमाडौं, १८ बैशाख ।
अखिल नेपाल सुकुम्बासी संघका इन्चार्ज नहेन्द्र खड्काले सुकुम्बासी बस्तीमा सरकारी डोजर प्रयोग गरी हटाउने कार्य अस्वीकार्य भएको बताएका छन्। बिहीबार संवाद डबलीमा आयोजित पत्रकार सम्मेलनमा उनले सरकारको वर्तमान कदमले देशभरका लाखौं सुकुम्बासी घरबारविहीन हुने खतरा बढेको दाबी गरे।
राष्ट्रिय भूमि आयोगका पूर्वउपाध्यक्षसमेत रहेका खड्काले सुकुम्बासी हटाउने क्रममा सुरक्षाकर्मी परिचालन गरिएकोप्रति असन्तुष्टि जनाउँदै यसले राज्यको भूमिकामाथि गम्भीर प्रश्न उठाएको बताए। उनले काठमाडौं उपत्यकासहित विभिन्न स्थानमा बस्ती हटाउने कार्यलाई “राज्य आतंक” को संज्ञा दिएका छन्।
खड्काले सुकुम्बासी, भूमिहीन दलित र अव्यवस्थित बसोबासीको अधिकार रक्षा गर्न चरणबद्ध संघर्षका कार्यक्रम घोषणा गरेका छन्। उनका अनुसार पहिलो चरणमा जनचेतना फैलाउने, दोस्रो चरणमा संगठन विस्तार र विरोध कार्यक्रम, तेस्रो चरणमा राजमार्ग अवरुद्ध गर्ने तथा चौथो चरणमा देशव्यापी आम हड्तालसम्मका कार्यक्रम समावेश छन्।
उनले सबै सुकुम्बासी र सरोकारवालालाई शान्तिपूर्ण आन्दोलनमा सहभागी हुन आह्वान गर्दै सरकारलाई तत्काल उठिबास रोक्न र लालपुर्जा वितरण प्रक्रिया अघि बढाउन आग्रह गरेका छन्।