सुकुम्बासीमाथि डोजर प्रयोगप्रति सांसदको आपत्ति, अध्यादेश शासनमाथि प्रश्न

ईमधेश न्यूज सम्वाददाता,
काठमाडौं, १६ बैशाख ।
 प्रतिनिधिसभा सदस्यहरूले सुकुम्बासीमाथि डोजर प्रयोग र अध्यादेशमार्फत शासन चलाउने विषयलाई गम्भीर रूपमा लिनुपर्ने बताएका छन्। बुधबार राजधानीमा आयोजित कार्यक्रममा बोल्दै सांसदहरूले गैरसुकुम्बासी हटाउने सरकारी कदम उचित भए पनि वास्तविक सुकुम्बासीलाई बेघर बनाउने कार्य अस्वीकार्य भएको धारणा राखे।
कार्यक्रममा बोल्दै नेकपाका युवा नेता तथा सांसद रमेश कुमार मल्लले सुकुम्बासीमाथि डोजर प्रयोगले सरकार जनताप्रति संवेदनशील नरहेको सन्देश दिएको बताए। उनले गरिब तथा निमुखा नागरिकमाथि शक्ति प्रयोग गर्नु दुःखद भएको उल्लेख गर्दै नीतिनिर्माणको थलो संसदलाई छलेर अध्यादेशबाट शासन चलाउने प्रयास लोकतान्त्रिक मूल्यमान्यताविपरीत भएको बताए।
त्यस्तै, सत्तारुढ राष्ट्रिय स्वतन्त्र पार्टीका सांसद रमेश कुमार सापकोटाले सरकारले वास्तविक सुकुम्बासीको पहिचान गरी उचित व्यवस्थापन गर्ने दाबी गरे। उनले सरकारी जग्गा अतिक्रमण गर्नेहरूलाई सुकुम्बासीको नाममा संरक्षण गर्न नसकिने उल्लेख गर्दै शहरको सौन्दर्य र राष्ट्रिय सम्पत्तिको संरक्षण पनि उत्तिकै महत्वपूर्ण रहेको बताए।
श्रम–संस्कृति पार्टीकी नेतृ राधिका रम्तेलले वास्तविक सुकुम्बासीलाई न्याय दिन सरकारलाई आग्रह गरिन्। कार्यक्रममा कर्णाली क्षेत्रका जनप्रतिनिधिहरूले समेत विकास, पूर्वाधार र सामाजिक न्यायका मुद्दालाई प्राथमिकतामा राख्नुपर्नेमा जोड दिएका थिए।