अस्थायी शिक्षक महासंघको १५ बुँदे घोषणाः माग पूरा नभए कडा आन्दोलन चेतावनी

ईमधेश न्यूज सम्वाददाता,
काठमाडौं, १३ बैशाख ।
 नेपाल अस्थायी शिक्षक तथा कर्मचारी महासंघ ले १५ बुँदे घोषणा पत्र सार्वजनिक गर्दै आफ्ना माग तत्काल सम्बोधन गर्न सरकारसँग आग्रह गरेको छ। आइतबार राजधानीमा आयोजित पत्रकार सम्मेलनमार्फत महासंघले चरणबद्ध आन्दोलनको चेतावनी दिएको हो।
महासंघका संयोजक विष्णु खत्री ले विगत लामो समयदेखि उठाइएका मागहरू सरकारले बेवास्ता गरेकोप्रति असन्तुष्टि व्यक्त गरे। उनले नेपाल शिक्षक महासंघ ले अस्थायी तथा राहत शिक्षक–कर्मचारीप्रति विभेदपूर्ण व्यवहार गरेको आरोप लगाउँदै छुट्टै संगठन गठन गर्नुपरेको बताए।
महासंघका संरक्षक खेमराज अधिकारी ले वर्षौंदेखि अस्थायी शिक्षकहरू राज्यबाट अपहेलित हुँदै आएको उल्लेख गरे। वरिष्ठ उपाध्यक्ष लालबहादुर श्रेष्ठ ले सामुदायिक विद्यालयमा अस्थायी शिक्षकको योगदान उच्च भए पनि उनीहरू अन्यायमा परेको बताए।
महासचिव जीवन तिमल्सिना ले सेवापश्चात् ‘गोल्डेन हेन्डसेक’ व्यवस्था लागू गर्न माग गरे। महासंघका सदस्य शंकर जिसी ले पेशागत निरन्तरता र सामाजिक सुरक्षा सुनिश्चित गरिए मात्रै शिक्षाको गुणस्तर सुधार हुने बताए।
घोषणापत्रमा ट्रेड युनियन अधिकारको संरक्षण, सामाजिक सुरक्षा कोषमा अनिवार्य आवद्धता, पेशागत निरन्तरता र विभेद अन्त्यजस्ता माग समेटिएका छन्। महासंघले माग सम्बोधन नभए कडा आन्दोलनमा उत्रिने चेतावनी दिएको छ।