नेपाल मेडिकल कलेजमा पिजी विद्यार्थीलाई शैक्षिक अभिमुखीकरण

ईमधेश न्यूज सम्वाददाता,
काठमाडौं, ११ बैशाख ।
 नेपाल मेडिकल कलेज मा स्नातकोत्तर (पिजी) तहमा भर्ना भएका विद्यार्थीहरूका लागि शैक्षिक अभिमुखीकरण कार्यक्रम सम्पन्न भएको छ। बिहीबार आयोजित कार्यक्रममा कलेजका अध्यक्ष प्रा. डा. जैनुद्धिन अन्सारी को प्रमुख आतिथ्यता रहेको थियो।
कार्यक्रममा एमडी, एमएम, एमडीएस तथा एमएस्सी नर्सिङ संकायका विद्यार्थीहरूलाई उत्प्रेरणामूलक अभिमुखीकरण प्रदान गरिएको थियो। अध्यक्ष अन्सारीले चिकित्सा शिक्षामा सफल हुन अनुशासन, मेहनत र लगनशीलता अत्यावश्यक रहेको उल्लेख गर्दै स्नातकोत्तर अध्ययनका तीन वर्षले नै पेशागत भविष्य निर्धारण गर्ने बताउनुभयो। उनले बिरामीसँगको व्यवहारले नै चिकित्सकको मूल्यांकन हुने धारणा राख्नुभयो।
प्रबन्ध निर्देशक डा. सबिहा यासमिन ले अध्ययन अवधिमा भएका गल्तीहरू सिकाइको हिस्सा भए पनि व्यावसायिक जीवनमा त्यस्ता कमजोरी अस्वीकार्य हुने बताउँदै निरन्तर सिकाइमा जोड दिनुभयो।
कार्यक्रममा निर्देशक डा. नुसरत जहाँ अन्सारी, प्राचार्य प्रा. डा. मोदनाथ मरहठ्ठा तथा अस्पताल निर्देशक प्रा. डा. निलमणी उपाध्याय ले नवआगन्तुक विद्यार्थीहरूलाई स्वागत गर्दै दक्ष चिकित्सक बन्न समर्पित अध्ययन गर्न आग्रह गर्नुभयो।