सुकुम्बासी बस्ती हटाइएपछि तेस्रोलिंगीको पीडा: आश्रयको खोजीमा बिनु

ईमधेश न्यूज सम्वाददाता,
काठमाडौं, २१ बैशाख ।
 सुकुम्बासी बस्तीमा डोजर चलाइएपछि विस्थापित भएका लैङ्गिक तथा यौनिक अल्पसंख्यक समुदायका सदस्यहरू गम्भीर आवासीय संकटमा परेका छन् । तीमध्ये एक तेस्रोलिंगी बिनु आइतबार दशरथ रङ्गशाला पुगेर नाम दर्ता गराएकी छन् । उनी तेस्रोलिंगी पहिचान उल्लेख गरेर दर्ता गराउने पहिलो व्यक्ति बनेकी हुन् ।
मनोहरा बस्तीबाट विस्थापित बिनुले कागजात देखाएपछि मात्रै दर्ता प्रक्रियामा प्रवेश पाएकी थिइन् । दर्ताका क्रममा उनले आफू परिवारबाट अलग्गिएको र हाल साथीकोमा आश्रित रहेको बताइन् । “हामीजस्ता मानिसका लागि छुट्टै व्यवस्था हुनुपर्छ,” उनले भनिन् ।
विस्थापनपछि तेस्रोलिंगी समुदायका धेरै सदस्यहरू अस्थायी रूपमा साथीभाइको सहारामा बस्न बाध्य छन् । घर भाडामा लिनसमेत लैङ्गिक पहिचानकै आधारमा विभेद भोग्नुपरेको उनीहरूको गुनासो छ । बिनुले सरकारसँग निःशुल्क सुविधा नभई सहकार्यमा सुरक्षित र दिगो बसोबासको व्यवस्था गर्न आग्रह गरेकी छन् ।
अधिकारकर्मी सुनिल बाबु पन्तले यस्तो अवस्थालाई गम्भीर मानवीय संकटको रूपमा व्याख्या गर्दै राज्यले तत्काल हस्तक्षेप गर्नुपर्ने बताए । साथै राष्ट्रिय मानव अधिकार आयोगलाई पनि यस विषयमा ध्यान दिन आग्रह गरिएको छ ।
विस्थापनपछि समुदायले आवासीय अभावसँगै सामाजिक बहिष्कार र असुरक्षाको दोहोरो मार खेपिरहेको छ । प्रभावितहरूले सुरक्षित, सम्मानजनक र दिगो बसोबासको शीघ्र व्यवस्था गर्न सरकारसँग माग गरेका छन् ।