जनमत पार्टी दुई धारमा, मधेस सरकारको समर्थनबारे दोहोरो दाबी

ईमधेश न्यूज सम्वाददाता,
जनकपुर, २२ बैशाख ।
 जनमत पार्टी मधेस प्रदेशमा आन्तरिक विवाद चुलिँदा प्रदेश सरकारलाई दिएको समर्थनबारे दोहोरो दाबी गरिएको छ । पार्टीका दुई पक्षले फरक–फरक धारणा सार्वजनिक गरेपछि राजनीतिक अन्योल बढेको हो ।
सोमबार पार्टीका सचेतक चन्दन सिंहले १० जना प्रदेशसभा सदस्यहरूको हस्ताक्षरसहित सरकारलाई दिएको समर्थन फिर्ता लिएको पत्र प्रदेश प्रमुखको कार्यालयमा बुझाएका थिए । तर उक्त पत्रबारे प्रदेश प्रमुख कार्यालयले औपचारिक जानकारी सार्वजनिक गरेको छैन ।
यता, संसदीय दलका नेता तथा मधेस प्रदेशका अर्थमन्त्री महेश प्रसाद यादवले सरकारलाई दिएको समर्थन यथावत् रहेको भन्दै छुट्टै पत्र पठाएका छन् । उनले आफ्नो जानकारीबिना बसेको बैठकको निर्णय आधिकारिक नहुने स्पष्ट पारेका छन् ।
उनले कृष्णा प्रसाद यादव नेतृत्वको वर्तमान मधेस प्रदेश सरकारलाई जनमत पार्टीको आधिकारिक समर्थन कायम रहेको दाबी गरेका छन् ।
पार्टीभित्र देखिएको यस विवादले मधेस प्रदेश सरकारको स्थायित्व र आगामी राजनीतिक समीकरणमा असर पार्ने विश्लेषण गरिएको छ ।