मालपोत कार्यालय बाँकेमा नागरिक गुनासो संकलन

ईमधेश न्यूज सम्वाददाता,
नेपालगञ्ज, ११ बैशाख ।
  बास नेपाल ले भूमिसुधार तथा मालपोत कार्यालय बाँकेमा सेवाग्राहीहरूबाट नागरिक गुनासो संकलन गरेको छ। सुशासन प्रवद्र्धन, सार्वजनिक गुनासो व्यवस्थापनमा सहजीकरण तथा सेवा प्रवाह सुधार गर्ने उद्देश्यले कार्यक्रम सञ्चालन गरिएको हो।
कार्यक्रमअन्तर्गत कार्यालय समयमै विभिन्न पालिका तथा जिल्लाबाट सेवा लिन आएका सेवाग्राहीहरूसँग प्रत्यक्ष भेटघाट गरी समस्या र सुझाव टिपोट गरिएको संयोजक माधव कार्की ले जानकारी दिए। संकलित गुनासोहरू कार्यालय प्रमुखसमक्ष प्रस्तुत गरी समाधानका लागि पहल गरिने जनाइएको छ।
संकलित गुनासोअनुसार एउटै कामका लागि पटक–पटक धाउनुपर्ने, सहायता कक्षको अभाव, सेवाग्राहीको अत्यधिक भीड व्यवस्थापनका लागि टोकन प्रणाली आवश्यक, पिउने पानी र शौचालयको अभाव, कार्यालय परिसरको सरसफाइ कमजोर, बस्ने व्यवस्था अपर्याप्त, सबै सेवा एकै स्थानबाट नपाइने तथा पार्किङ व्यवस्थापन कमजोर रहेको उल्लेख गरिएको छ।
कार्यक्रममा बास नेपालका मिना घर्ति, ज्योती बुढामगर, ज्योती दास, रचना चौधरी र सङ्गीता बिकले पनि सेवाग्राहीसँग गुनासो संकलन गरेका थिए। संस्थाले यस्ता कार्यक्रममार्फत सरकारी सेवा प्रवाहमा सुधार ल्याउन निरन्तर पहल गर्दै आएको जनाएको छ।