मधेसमा बालेनको चुनावी दौड सुरु, विभिन्न जिल्लामा भेटघाट तथा सभा

लिलाकान्त यादव,
राजविराज, २८ माघ ।
 राष्ट्रिय स्वतन्त्र पार्टी (रास्वपा)का वरिष्ठ नेता तथा झापा–५ का प्रतिनिधिसभा उम्मेदवार बालेन्द्र शाह (बालेन)ले मधेस प्रदेशमा चुनावी अभियान सुरु गरेका छन्। उनले सोमबार बिहान सप्तरीको सप्तकोसी नगरपालिकाबाट मधेस केन्द्रित कार्यक्रमको थालनी गरेका हुन्।
झापाबाट कार्यक्रम सकेर मधेस प्रवेश गरेका शाहले पहिलो चरणमा सप्तरीका कञ्चनपुर, भारदह, हनुमाननगर, राजविराज, डाक्नेश्वरी, बोदेबसाइन, भगवानपुर, नवराजपुर, बरियारपट्टी र औरहीमा आयोजना गरिएका कार्यक्रमहरूमा सहभागी हुने तालिका रहेको जनाइएको छ।
त्यसैगरी, सिराहाको जिरोमाइल, गोलबजार, चोहर्वा, मिर्चैया, कल्याणपुर र सिराहा सदरमुकाममा मतदाता भेटघाट गर्ने कार्यक्रम छ। धनुषाको यदुकुवा, धनुषाधाम, नगराइन तथा महोत्तरीको जलेश्वर, एकडारा, बलबा, सरपल्लो र बर्दिबासमा समेत उनले चुनावी सभालाई सम्बोधन गर्ने र स्थानीयसँग अन्तरक्रिया गर्ने जनाइएको छ।
रास्वपाले मधेसमा संगठन सुदृढीकरण र मतदातासँग प्रत्यक्ष संवादलाई अभियानको प्राथमिकता बनाएको जनाएको छ। स्थानीय तहमा घरदैलो, कोणसभा र अन्तरक्रियात्मक कार्यक्रममार्फत मत माग्ने रणनीति अवलम्बन गरिएको पार्टी स्रोतले जानकारी दिएको छ।