संयुक्त सामान ढुवानी व्यवसायी संघको आठौँ साधारणसभा तथा तेस्रो अधिवेशन सम्पन्न, अध्यक्षमा धर्मराज पोखरेल निर्वाचित

संयुक्त सामान ढुवानी व्यवसायी संघको आठौँ साधारणसभा तथा तेस्रो अधिवेशन सम्पन्न, अध्यक्षमा धर्मराज पोखरेल निर्वाचित
मधेश न्यूज सम्वाददाता,
काठमाडौं, २७ माघ ।
 संयुक्त सामान ढुवानी व्यवसायी संघको आठौँ साधारणसभा तथा तेस्रो अधिवेशन काठमाडौँस्थित होटल हेभन रिसोर्टमा सम्पन्न भएको छ। अधिवेशनबाट धर्मराज पोखरेल संघको अध्यक्षमा निर्वाचित भएका छन्।
निर्वाचन परिणामअनुसार उपाध्यक्षमा जयप्रसाद भट्टराई, सचिवमा कुमार श्रेष्ठ, सह–सचिवमा नवराज भुजेल र कोषाध्यक्षमा प्रकाशसिंह धामी निर्वाचित भएका छन्। कार्यसमिति सदस्यमा सुजन सिलवाल, राजकुमार बि.सी., निरज श्रेष्ठ र कान्तिकुमारी खड्का चयन भएका छन्।
साधारणसभालाई सम्बोधन गर्दै ढुवानी व्यवसायी महासंघ–नेपालका अध्यक्ष माधवप्रसाद नेपालले राज्यले ढुवानी व्यवसायप्रति हेर्ने दृष्टिकोण परिवर्तन गर्नुपर्ने बताएका छन्। उनले राजस्व अनुसन्धानका नाममा व्यवसायीलाई अनावश्यक दुःख दिने गरिएको उल्लेख गर्दै बजेटमार्फत व्यवसायीमैत्री कर प्रणाली लागू गर्नुपर्नेमा जोड दिए। काठमाडौँमा व्यवस्थित ‘ट्रान्सपोर्ट नगर’को आवश्यकता औंल्याउँदै उनले सरकार र महासंघबीच समन्वय अपरिहार्य रहेको बताए।
अधिवेशनले नयाँ नेतृत्व चयनसँगै संगठन सुदृढीकरण, व्यवसायिक हक–हित संरक्षण र ढुवानी क्षेत्रलाई मर्यादित तथा व्यवस्थित बनाउने कार्यदिशा तय गरेको जनाएको छ। कार्यक्रममा महासंघका वरिष्ठ उपाध्यक्ष अच्युतराज खनाल, उपाध्यक्ष अरुणकुमार श्रेष्ठ, महासचिव पुष्पराज श्रेष्ठलगायतको उपस्थिति रहेको थियो।