सम्माननीय उपराष्ट्रपति यादवसँग जापानी राजदूतको शिष्टाचार भेट

लिलाकान्त यादव,
काठमाडौं, २६ माघ ।
 सम्माननीय उपराष्ट्रपति रामसहाय प्रसाद यादवज्यूसँग नेपालका लागि जापानका महामहिम राजदूत मायदा तोरुले लैनचौरस्थित उपराष्ट्रपतिको कार्यालयमा सोमबार शिष्टाचार भेट गर्नुभएको छ।
भेटमा शुभकामना आदानप्रदानसहित नेपाल–जापानबीचको द्विपक्षीय सम्बन्ध, आर्थिक सहयोग, संस्कृति, पर्यटन तथा जनस्तरको सम्बन्धलगायत विविध विषयमा छलफल भएको थियो। उपराष्ट्रपति यादवले सन् १९५६ मा कूटनीतिक सम्बन्ध स्थापना भएदेखि नै दुई देशबीच सहयोग, निकटता र गहिरो मित्रता कायम रहेको उल्लेख गर्नुभयो। उहाँले यस वर्ष मनाइँदै गरेको नेपाल–जापान कूटनीतिक सम्बन्धको ७० औँ वार्षिकोत्सवलाई महत्वपूर्ण कोशेढुङ्गा बताउनुभयो।
नेपालका लागि जापान महत्वपूर्ण र विश्वासिलो विकास साझेदार रहेको उल्लेख गर्दै उहाँले मानव संसाधन विकास, स्वास्थ्य, कृषि, पूर्वाधार, वातावरण संरक्षण तथा संस्कृति क्षेत्रमा जापानको योगदान सराहनीय रहेको बताउनुभयो। साथै, औद्योगिक विकास, जलविद्युत र लगानी विस्तारमा सहकार्यको सम्भावना औंल्याउनुभयो।
उपराष्ट्रपति यादवले जापानमा बसोबास गर्ने नेपाली समुदायले द्विपक्षीय सम्बन्ध सुदृढ बनाउन योगदान पु¥याएको उल्लेख गर्नुभयो। सो अवसरमा राजदूत तोरुले नेपालको विकासमा जापानको निरन्तर सहयोग रहने प्रतिबद्धता व्यक्त गर्नुभयो।