सयौँ नेता–कार्यकर्ता जनमत पार्टीमा प्रवेश

ईमधेश न्युज सम्वाददाता,
राजविराज २५ माघ ।
 समाजसेवी तथा अग्रज नेता सूर्यनारायण यादव, इन्जिनियर सुधीर कुमार मण्डल, सत्येन्द्र नारायण यादव र इन्जिनियर संजीव नारायण यादवसहित सयौँ अग्रज तथा युवाहरू जनमत पार्टीमा प्रवेश गरेका छन्।
राजविराजमा आयोजित कार्यक्रममा नवप्रवेशीहरूलाई जनमत पार्टीका संगठन विभाग प्रमुख तथा सप्तरी क्षेत्र नम्बर १ का उम्मेदवार डा. जयकान्त राउत, मधेश प्रदेशका अर्थमन्त्री महेश प्रसाद यादव तथा सप्तरी क्षेत्र नम्बर ३ का उम्मेदवार सुरेन्द्र मधेशीलगायत नेताहरूले स्वागत गरेका हुन्।
कार्यक्रममा नेताहरूले मधेश निर्माण, पहिचान स्थापना र अधिकार सुनिश्चितताका लागि सबै एकताबद्ध हुनुपर्नेमा जोड दिएका थिए। जनताको विश्वासलाई व्यवहारमा रूपान्तरण गर्दै समुन्नत, न्यायपूर्ण र आत्मसम्मानयुक्त समाज निर्माण गर्ने प्रतिबद्धता व्यक्त गरिएको थियो।
नवप्रवेशीहरूलाई पार्टीले हार्दिक स्वागत गर्दै आगामी राजनीतिक यात्राका लागि शुभकामना व्यक्त गरेको छ।