बास नेपालको आयोजनामा असल शासन क्लबका पूर्व अध्यक्षहरूको भेला सम्पन्न

ईमधेश न्यूज सम्वाददाता,
नेपालगञ्ज, २३ माघ । 
बास नेपालको आयोजनामा असल शासन क्लबका पूर्व अध्यक्षहरूको भेला सम्पन्न भएको छ। बाँकेस्थित बास नेपालको केन्द्रीय कार्यालयमा आयोजित भेलामा जिल्लाभर सक्रिय रहिसकेका विभिन्न असल शासन क्लबका पूर्व अध्यक्षहरूको सहभागिता रहेको थियो।
असल शासन क्लब जिल्ला समन्वय समिति बाँकेका संस्थापक अध्यक्ष तथा बास नेपालका कार्यकारी निर्देशक नमस्कार शाहले सञ्चालन गरेको कार्यक्रममा सहभागीहरूले विगतका अनुभव साझा गरेका थिए। प्रो पब्लिकको असल शासन कार्यक्रम अन्तर्गत २०५६ देखि २०६५ सालसम्म बाँकेका साविकका गाविस र नगरपालिकामा ६२ वटा असल शासन क्लब क्रियाशील रहेका थिए। हाल बास नेपाल बाहेक अधिकांश क्लब निष्क्रिय अवस्थामा छन्।
कार्यक्रममा बोल्दै कार्यकारी निर्देशक शाहले २५ वर्षअघि उठाइएको सुशासनको एजेण्डा आज पनि उत्तिकै सान्दर्भिक रहेको बताए। वक्ताहरूले क्लबमार्फत भ्रष्टाचारविरुद्ध अभियान, सार्वजनिक सुनुवाइको अभ्यास र क्षमता अभिवृद्धिमा महत्वपूर्ण योगदान पुगेको स्मरण गरे।
२० भन्दा बढी सुशासन अभियन्ताको उपस्थिति रहेको कार्यक्रमको समापन बास नेपालका केन्द्रीय अध्यक्ष शिवकुमार बर्माले गरेका थिए।