डाक्नेश्वरीमा उपेन्द्र यादवको चुनावी दौड तीव्र, जनताले विकास अभावको गुनासो गरे

उमेश कुमार यादव,
राजविराज, २३ माघ ।
 सप्तरी क्षेत्र नम्बर ३ बाट प्रतिनिधिसभा सदस्यका उम्मेदवार तथा जनता समाजवादी पार्टी नेपालका अध्यक्ष उपेन्द्र यादवले बिहीबार डाक्नेश्वरी नगरपालिकाका विभिन्न गाउँमा चुनावी छलफल तथा भेंटघाटलाई तीव्रता दिएका छन् ।
लक्ष्मीपुर, पातो, बलाटी र बनौलाका स्थानीयसँगको भेटघाटमा अधिकांश मतदाताले विगतमा निर्वाचित जनप्रतिनिधिले अपेक्षाअनुसार विकास नगरेको गुनासो गरेका छन् । सहज सडक पहुँचको अभाव, सिँचाइ समस्या, गुणस्तरीय शिक्षा र सुविधासम्पन्न अस्पताल नहुनु, पुल अभावमा वर्षायाममा आवतजावतमा कठिनाइ, समयमा मलखाद नपाइनु, महिला तथा युवाको अवसर अभाव, बेरोजगारी र नदी नियन्त्रणजस्ता विषय स्थानीयले उठाएका थिए ।
उम्मेदवार यादवले जनताको गुनासोलाई स्वाभाविक ठहर गर्दै क्षेत्र अपेक्षाकृत पछाडि परेको स्वीकार गरे । उनले बाटोघाटो, स्वास्थ्य, गरिबी, बेरोजगारी र समग्र विकासलाई प्रमुख प्राथमिकता दिने बताए । “बोल्नुभन्दा परिणाममा विश्वास गर्छु, परिवर्तन जनताले अनुभूति गर्नेछन्,” उनले प्रतिबद्धता जनाए ।
कार्यक्रममा पार्टीका केन्द्रीय तथा जिल्ला तहका नेताहरूको सहभागिता रहेको थियो ।