सर्वोच्चको आदेश कार्यान्वयन माग्दै माघ २४ मा विगेसोको राजधानीमा प्रदर्शन

ईमधेश नयूज सम्वाददाता,
काठमाडौँ, २२ माघ ।
 ब्रिटिश गोर्खा भूतपूर्व सैनिक संगठन (विगेसो) ले सर्वोच्च अदालतको निर्देशनात्मक आदेश तीन वर्ष बितिसक्दा पनि कार्यान्वयन नभएको भन्दै नेपाल सरकारविरुद्ध संघर्षका कार्यक्रम घोषणा गरेको छ । संगठनले माघ २४ गते काठमाडौंमा प्रदर्शन गर्ने जनाएको हो ।
बिहीबार राजधानीको संवाद डबलीमा आयोजित पत्रकार सम्मेलनमा विगेसोले २०७९ माघ २४ गते सर्वोच्च अदालतले जारी गरेको आदेशलाई सरकारले बेवास्ता गरेको आरोप लगाएको छ । विगेसोका प्रमुख सल्लाहकार परि थापाले बेलायत सरकारले ब्रिटिश गोर्खा सैनिकलाई भाडाका सैनिकका रूपमा प्रयोग गरिरहँदा नेपाल सरकार मौन बस्नु दुःखद भएको बताए । “सर्वोच्च अदालतको निर्देशनात्मक आदेश हुँदाहुँदै पनि तीन वर्षसम्म कार्यान्वयन नहुनु राज्यको गम्भीर लापरवाही हो,” उनले भने ।
विगेसोका अध्यक्ष पदमसुन्दर लिम्बुले सर्वोच्च अदालतले नेपालीलाई भाडाका सैनिक बनाउने कार्य रोक्न दिएको सकारात्मक फैसलालाई सरकारले कार्यान्वयन नगरेकाले आन्दोलनमा जान बाध्य भएको बताए । उनका अनुसार माघ २४ गते बिहान ११ बजे माइतीघर मण्डलामा भेला भई नयाँ बानेश्वरसम्म प्रदर्शन गर्दै पुनः माइतीघरमै फर्किएर कोणसभा गर्ने कार्यक्रम तय गरिएको छ ।
लिम्बुले सन् १९४७ को असमान र राष्ट्रघाती सन्धिको खारेजी, साथै बेलायत, भारत, सिंगापुर र ब्रुनाईमा गोर्खा भर्तीका नाममा भइरहेको विभेदप्रति राज्य उदासिन रहेको आरोप लगाए । उनले गोर्खा सैनिकमाथि भइरहेको अन्याय राष्ट्रिय स्वाधीनतासँग जोडिएको विषय भएको उल्लेख गर्दै सरकार गम्भीर हुनुपर्ने बताए ।
विगेसोले गोर्खा भूतपूर्व सैनिकको न्याय सुनिश्चित गर्न मात्र नभई राष्ट्रिय सम्मान र स्वाधीनताको रक्षाका लागि संघर्ष जारी रहने स्पष्ट पारेको छ ।