गजेन्द्रनारायण सिंह अस्पताल राजविराजमा OPG, CBCT र इको सेवा सुरु हुँदै

राजविराज, २० माघ ।
 गजेन्द्रनारायण सिंह अस्पताल राजविराजमा अत्याधुनिक OPG, CBCT (कोन बिम कम्प्युटेड टोमोग्राफी) र इको सेवा सुरु हुने भएको छ । लामो समयको प्रतीक्षापछि यी सेवाहरू केही दिनमै सञ्चालनमा ल्याइने अस्पतालका मेडिकल सुपरिटेन्डेन्ट डा. अबधेश मिश्राले जानकारी दिनुभयो ।
डा. मिश्राका अनुसार OPG र CBCT मेसिनको सम्पूर्ण सेटअप सम्पन्न भइसकेको छ । काठमाडौँको वीर अस्पतालपछि मधेस र कोशी प्रदेशमा राजविराजमै पहिलोपटक OPG र CBCT सेवा जडान हुन लागेको हो । यसबाट सप्तरीसहित सिराहा, सुनसरी, उदयपुरलगायत जिल्लाका बिरामी लाभान्वित हुने अपेक्षा गरिएको छ ।
वरिष्ठ डेन्टल सर्जन कृष्णदेव ठाकुरका अनुसार CBCT प्रविधि दाँत, जबडा र मुखको त्रि–आयामिक (3D) स्पष्ट तस्बिरका लागि उपयोगी हुन्छ, जसले रुट क्यानाल, इम्प्लान्ट तथा बुद्धिदाँत उपचारमा सटीक सहयोग पुर्‍याउँछ । हाल अस्पतालमा दैनिक ३५–४० जना दन्तसम्बन्धी बिरामी आउने गरेका छन् ।
सेवा सुरु भएपछि काठमाडौँ धाउनुपर्ने बाध्यता हट्ने र सस्तो, सुलभ उपचार स्थानीयमै उपलब्ध हुने विश्वास अस्पतालले व्यक्त गरेको छ ।