पब्लिक स्पिच बाँकेको चौथो श्रृंखला ः अडिसन राउण्ड सम्पन्न, १० प्रतिस्पर्धी फाइनलमा

ईमधेश न्यूज सम्वाददाता,
नेपालगञ्ज, १९ माघ ।
 बास नेपालको आयोजनामा सञ्चालन भइरहेको पब्लिक स्पिच बाँकेको चौथो श्रृंखला अन्तर्गत अडिसन राउण्ड नेपालगञ्जमा भव्य रूपमा सम्पन्न भएको छ । अडिसन राउण्डबाट १० जना प्रतिस्पर्धी फाइनल राउण्डका लागि छनोट भएका छन् ।
विद्यार्थी तथा युवाहरूको वक्तृत्वकला, वाक् क्षमता र सार्वजनिक भाषणकला अभिवृद्धि गर्ने उद्देश्यले बास नेपालले विगतका वर्षदेखि निरन्तर रूपमा पब्लिक स्पिच प्रतियोगिता आयोजना गर्दै आएको छ । चौथो श्रृंखलाअन्तर्गत बाँके जिल्लाका विभिन्न विद्यालय तथा कलेजबाट १५ जना विद्यार्थीले अडिसन राउण्डमा सहभागिता जनाएका थिए ।
अडिसनका क्रममा प्रतिस्पर्धीहरूले ‘नैतिकता भ्रष्टाचार नियन्त्रणको प्रमुख आधार’, ‘मेरो देशको समृद्धिका आधार’ तथा ‘देशको मूल प्रवाहमा अपाङ्गता भएका व्यक्तिहरूको सहभागिता सुनिश्चितता’ जस्ता समसामयिक र गम्भीर विषयमा आफ्नो मन्तव्य प्रस्तुत गरेका थिए । गोलाप्रथामार्फत विषय छनोट गरी सहभागीहरूलाई तोकिएको विषयमा चार मिनेटको समय प्रदान गरिएको थियो । प्रतिस्पर्धीहरूले आत्मविश्वास, विषयवस्तुको गहिरो विश्लेषण र प्रस्तुतीकरण क्षमतामार्फत निर्णायक तथा दर्शकको ध्यान आकर्षित गरेका थिए ।
नेपालगञ्ज उपमहानगरपालिकाका प्रमुख प्रशासकीय अधिकृत रामहरी शर्माको प्रमुख आतिथ्यतामा सम्पन्न कार्यक्रममा शिक्षाविद् किरण आचार्य तथा वरिष्ठ पत्रकारद्वय रुद्र खड्का र कृष्ण अधिकारी निर्णायकको भूमिकामा रहनुभएको थियो । कार्यक्रममा बोल्दै प्रमुख अतिथि शर्माले यस्ता प्रतियोगिताले युवाहरूलाई आत्मविश्वासी, जिम्मेवार र सचेत नागरिक बनाउन महत्वपूर्ण भूमिका खेल्ने बताउनुभयो ।
निर्णायकहरूको मूल्याङ्कनका आधारमा बर्षिका भण्डारी, सृष्टि बुढामगर, मनिषा उपाध्याय, लक्ष्मी पोख्रेल, आशिका केसी, चन्द्रलाल जैसी, दीक्षिका खत्री, प्रणिशा भट्टराई, सगुन तिवारी र सबिना कठायत फाइनल राउण्डका लागि छनोट भएका छन् ।
आयोजक बास नेपालका अनुसार फाइनल राउण्ड आगामी माघ २८ गते सि.एस.टी. होटल नेपालगञ्जमा आयोजना हुनेछ । फाइनल चरणमा प्रतिस्पर्धीहरूले युवा शक्ति र यसको सदुपयोग, बौद्धिक पलायन रोकथामका दिगो उपाय, आर्थिक स्वतन्त्रता तथा सुशासनसम्बन्धी विषयमा मन्तव्य प्रस्तुत गर्नेछन् । आयोजकले प्रतियोगितामार्फत युवाहरूको नेतृत्व क्षमता र अभिव्यक्ति स्वतन्त्रतालाई सशक्त बनाउने लक्ष्य लिएको जनाएको छ ।