काठमाडौं अधिकार माग्न होइन, घुम्न जाने ठाउँ हो: बालेन

ईमधेश न्यूज सम्वाददाता,
जनकपुरधाम, ०५ माघ ।
 राष्ट्रिय स्वतन्त्र पार्टी (रास्वपा)का वरिष्ठ नेता बालेन शाहले काठमाडौं अधिकार माग्न धाउने ठाउँ नभई घुम्न जाने सहर भएको टिप्पणी गरेका छन्। सोमबार जनकपुरधाममा आयोजित कार्यक्रममा मैथिली भाषामा सम्बोधन गर्दै उनले प्रदेश सरकारहरू बलियो भए अधिकारका लागि केन्द्र धाउनुपर्ने अवस्था नआउने बताएका हुन्।
संघीयताको पक्षमा धारणा राख्दै शाहले प्रदेश र स्थानीय तह सशक्त नहुँदासम्म संघीयताको सार्थक कार्यान्वयन सम्भव नहुने उल्लेख गरे। उनले जनताको अधिकार आफ्नै प्रदेश र स्थानीय सरकारबाट सुनिश्चित हुनुपर्नेमा जोड दिए।
मेयर पदबाट राजीनामा दिएपछि फुर्सद मिलेकाले देशका विभिन्न ठाउँमा पुगेर जनतासँग प्रत्यक्ष संवाद गरिरहेको पनि शाहले बताए। उनले वर्तमान राजनीतिक अभ्यासप्रति असन्तुष्टि जनाउँदै जनताको आवाजलाई केन्द्रमा राखेर राजनीति अघि बढ्नुपर्ने आवश्यकता औंल्याए।