पुराना सिक्का संकलन गर्ने दाजु–बहिनी सम्मानित

र्ईमधेश न्यूज सम्वाददाता,
भक्तपुर, ०५ माघ ।
 पुराना ऐतिहासिक सिक्काहरू संकलन गर्दै आएका दाजु–बहिनीलाई भक्तपुरमा सम्मान गरिएको छ । भक्तपुर घर भई हाल काठमाडौंमा बसोबास गर्दै आएका लक्ष्यजित मल्ल र समृद्धि मल्ललाई श्री सरस्वती माध्यमिक विद्यालय, चाँगुनारायण नगरपालिका–८ भक्तपुरको ६४औँ वार्षिकोत्सवको अवसरमा सम्मान गरिएको हो ।
बागमती प्रदेशका संस्कृति तथा पर्यटन मन्त्री सुरेश श्रेष्ठले उनीहरूलाई सम्मानपत्र प्रदान गर्दै पुराना सिक्काहरू संकलन गर्नु इतिहास र संस्कृतिको संरक्षणमा महत्वपूर्ण योगदान भएको बताउनुभयो ।
कार्यक्रममा पाँच जना पत्रकारहरू पनि सम्मानित भएका छन् । सम्मानित पत्रकारहरूमा कृष्ण किसी, प्रेमध्वज लामा, हरिसुन्दर छुकाँ, कृष्ण नेपाल र हरिशरण बास्तोला रहेका छन् ।
वार्षिकोत्सव कार्यक्रममा बागमती प्रदेशका पूर्वमन्त्री हरिप्रभा खड्गी, चाँगुनारायण नगरपालिकाका उपप्रमुख रमेश बुढाथोकी, चाँगुनारायण नगरपालिकाका निवर्तमान प्रमुख तथा नेकपा एमालेका नेता सोम मिश्र, विद्यालय व्यवस्थापन समितिका अध्यक्ष सन्जिव पुरी र प्रधानाध्यापक टिकाराम पाण्डेयले विद्यालयको शैक्षिक तथा संस्थागत विकासका विषयमा मन्तव्य राख्नुभएको थियो ।
कार्यक्रमको अवसरमा विद्यार्थीहरूद्वारा विविध सांस्कृतिक प्रस्तुतिहरू पनि प्रदर्शन गरिएको थियो ।