पूर्वमन्त्री रामेश्वर राय यादवसहितको समूह जसपा नेपालमा प्रवेश

ईमधेश न्यूज सम्वाददाता,
काठमाडौं, ०४ माघ ।
 पूर्व श्रममन्त्री तथा नेपाल कम्युनिष्ट पार्टीका केन्द्रीय सदस्य रामेश्वर राय यादवसहित सर्लाहीका दर्जनौं नेता–कार्यकर्ता जनता समाजवादी पार्टी (जसपा) नेपालमा प्रवेश गरेका छन् ।
आइतबार पार्टी केन्द्रीय कार्यालय बालकुमारीमा आयोजित कार्यक्रममा जसपा नेपालका राष्ट्रिय अध्यक्ष उपेन्द्र यादवले उनीहरूलाई खादा र माला लगाएर पार्टीमा स्वागत गर्नुभयो । मधेश आन्दोलनबाट उदाएर राष्ट्रिय राजनीतिमा प्रभावशाली छवि बनाएका रामेश्वर राय यादवको प्रवेशलाई जसपा नेपालले संगठन सुदृढीकरणको महत्वपूर्ण उपलब्धिका रूपमा लिएको छ ।
यादवसँगै सर्लाही क्षेत्र नं. ३ अन्तर्गत चक्रघट्टा गाउँपालिकाका पूर्व अध्यक्ष विक्रम यादव तथा पत्रकार विजय यादव पनि जसपा नेपालमा प्रवेश गरेका छन् । कार्यक्रममा सहभागी नेताहरूले मधेशका मुद्दा, पहिचान, अधिकार र समावेशी लोकतन्त्रका लागि जसपा नेपाल उपयुक्त राजनीतिक शक्ति भएकाले पार्टीमा आबद्ध भएको बताएका छन् ।
अध्यक्ष उपेन्द्र यादवले नवप्रवेशीहरूलाई स्वागत गर्दै मधेश आन्दोलनका उपलब्धि रक्षा र संघीय लोकतान्त्रिक गणतन्त्र सुदृढ गर्न सबैलाई एकजुट भएर अघि बढ्न आग्रह गर्नुभयो ।