उपराष्ट्रपति यादवद्वारा सोनाम ल्होसारको शुभकामना

लिलाकान्त यादव,
काठमाडौं,  ०४ माघ ।
 उपराष्ट्रपति रामसहाय प्रसाद यादवले तामाङ समुदायसहित ह्योल्मो, थकाली, जिरेल, नेस्याङ्वा, भोटे, दुरा, लेप्चा लगायतका आदिवासी जनजातिहरूले मनाउने महान पर्व सोनाम ल्होसार २०८२ को अवसरमा शुभकामना व्यक्त गर्नुभएको छ ।
शुभकामना सन्देश जारी गर्दै उपराष्ट्रपति यादवले स्वदेश तथा विदेशमा रहेका सम्पूर्ण नेपालीमा शान्ति, समृद्धि, सुस्वास्थ्य र दीर्घायुको कामना गर्नुभएको हो । उहाँले सोनाम ल्होसारले नयाँ वर्षको आगमनसँगै मौलिक संस्कृति, परम्परा र जीवनशैलीलाई संरक्षण तथा प्रवद्र्धन गर्न महत्वपूर्ण भूमिका खेलेको उल्लेख गर्नुभयो ।
उपराष्ट्रपति यादवले भूमिपूजा, कुलपूजा, दानदक्षिणा, ढोगभेट तथा शुभकामना आदान–प्रदानजस्ता परम्परागत अभ्यासहरूले सामाजिक सद्भाव, आपसी विश्वास र सहकार्यलाई बलियो बनाउने बताउनुभयो । साथै, मौलिक नृत्य, गीत, वाद्यसंगीत र परम्परागत परिकारहरूले राष्ट्रिय सांस्कृतिक पहिचानलाई उजागर गर्ने उहाँको भनाइ छ ।
शुभकामना सन्देशमा संविधानले अंगीकार गरेका गणतन्त्र, संघीयता, समानता, समावेशिता र धर्मनिरपेक्षताजस्ता मूल्यहरूलाई यस्ता पर्वहरूले थप सुदृढ बनाउने विश्वास व्यक्त गरिएको छ । उपराष्ट्रपति यादवले सोनाम ल्होसारले सामाजिक सद्भाव, भाइचारा र राष्ट्रिय एकतालाई मजबुत बनाउँदै मुलुकलाई शान्ति र समृद्धितर्फ अग्रसर गराओस् भन्ने कामना गर्नुभएको छ ।