उपराष्ट्रपति यादवद्वारा माघी पर्वको शुभकामना, राष्ट्रिय एकता र समृद्धिको सन्देश

लिलाकान्त यादव,
काठमाडौं, ३० पौष ।
 उपराष्ट्रपति रामसहाय प्रसाद यादवले माघी पर्व (माघे संक्रान्ति), २०८२ को अवसरमा स्वदेश तथा विदेशमा रहनु भएका सम्पूर्ण नेपाली दिदीबहिनी तथा दाजुभाइहरूलाई सुख, शान्ति, समृद्धि र सुस्वास्थ्यको कामना गर्दै हार्दिक शुभकामना व्यक्त गर्नुभएको छ ।
शुभकामना सन्देश जारी गर्दै उपराष्ट्रपति यादवले नेपालमा माघ १ गते विभिन्न भूगोल, समुदाय र संस्कृतिअनुसार माघी, तिला संक्रान्ति, येले सम्वत्, छार म्हेङलगायत नामले यो पर्व उल्लासपूर्वक मनाइने उल्लेख गर्नुभयो । नाम फरक भए पनि माघी पर्वको मूल भाव विविधतामा एकता, सांस्कृतिक गौरव र सामाजिक सद्भाव रहेको उहाँको भनाइ छ ।
उपराष्ट्रपतिले हिन्दू धर्मावलम्बीहरूले माघे संक्रान्तिलाई सूर्यदेवको उत्तरायण यात्रा प्रारम्भ हुने पुण्य दिनका रूपमा मनाउने परम्परा रहेको स्मरण गराउनुभयो । यस अवसरमा पवित्र नदीमा स्नान, दान–पुण्य तथा धार्मिक अनुष्ठान गर्ने चलनले समाजमा करुणा, सहअस्तित्व र सहयोगको भावना प्रवद्र्धन गर्ने बताउनुभयो ।
उहाँले माघी पर्वका अवसरमा तिल, चिउरा, गुड, घिउ, चाकु तथा विभिन्न कन्दमूल खाने परम्पराले स्वास्थ्य प्रवद्र्धन गर्नुका साथै स्थानीय कृषि उत्पादन, बजार र व्यापारलाई पनि टेवा पु¥याउने उल्लेख गर्नुभयो । साथै, माघ १ गते राष्ट्रिय कृषि जैविक विविधता दिवसका रूपमा समेत मनाइने भएकाले जैविक स्रोतको संरक्षण र दिगो उपयोगमा सबै सरोकारवाला सचेत हुनुपर्ने आवश्यकता औंल्याउनुभयो ।
अन्त्यमा, उपराष्ट्रपति यादवले माघी पर्वले राष्ट्रिय एकता, भाइचारा, मेलमिलाप र समृद्धिको यात्रामा अघि बढ्न सबैलाई प्रेरणा प्रदान गरोस् भन्ने कामना गर्नुभएको छ ।