अपाङ्ग र असहायलाई राजगढ गाउँपालिकाद्वारा फाइबर सिरक वितरण

लिलाकान्त यादव,
काठमाडौं, ३० पौष ।
 सप्तरीको राजगढ गाउँपालिकाले २ सय ५५ जना अपाङ्ग तथा असहाय नागरिकलाई फाइबर सिरक वितरण गरेको छ।
गाउँपालिकाको आयोजनामा बिहीबार वडा नम्बर १ देखि ६ सम्मका “क” र “ख” वर्गमा सूचीकृत अपाङ्ग तथा असहाय नागरिकलाई न्यानो सामग्रीका रूपमा फाइबर सिरक वितरण गरिएको हो। चिसो मौसमका कारण जेष्ठ नागरिक, अपाङ्ग तथा विपन्न वर्ग स्वास्थ्य जोखिममा नपरुन् भन्ने उद्देश्यले कार्यक्रम आयोजना गरिएको गाउँपालिकाले जनाएको छ।
कार्यक्रममा गाउँपालिका अध्यक्ष ओमप्रकाश मण्डलले चिसोका कारण कुनै पनि जेष्ठ नागरिक कष्टमा नपरोस् भन्ने लक्ष्यसहित पालिकाले न्यानो सामग्री वितरण गर्दै आएको बताउनुभयो। उहाँले असहाय तथा विपन्न वर्गको संरक्षण गाउँपालिकाको प्राथमिकतामा रहेको उल्लेख गर्नुभयो।
त्यसैगरी प्रमुख प्रशासकीय अधिकृत सरोज कुमार झाले फाइबर सिरक वितरण कार्यक्रमअन्तर्गत “क” वर्गका १ सय ५५ जना र “ख” वर्गका १ सय जना अपाङ्ग तथा असहाय नागरिकलाई सहयोग प्रदान गरिएको जानकारी दिनुभयो। उपाध्यक्ष रेणु देवी मण्डलले चिसो मौसममा ज्यान जोगाउन पालिकाले न्यानो सामग्री वितरण गरेको बताउनुभयो।
पालिकाको सभाहलमा आयोजित कार्यक्रममा उपाध्यक्ष रेणु देवी मण्डल, अपाङ्ग समन्वय समिति सदस्य रामचन्द्र यादव, सेभ द नेपाल सप्तरीका जिल्ला संयोजक विरेन्द्र कुमार साह तथा पालिकाका विभिन्न शाखा प्रमुखहरूको उपस्थिति रहेको थियो।