काठमाडौँ सामान ढुवानी व्यवसायी संघको ११औँ वार्षिक साधारण सभा सम्पन्न

ईमधेश न्यूज सम्वाददाता,
काठमाडौँ, २८ पौष ।
 काठमाडौँ सामान ढुवानी व्यवसायी संघको ११औँ वार्षिक साधारण सभा बागमती प्रदेशका मुख्यमन्त्री तथा नेपाली कांग्रेस बागमती प्रदेश सभापति इन्द्रबहादुर बानियाँको प्रमुख आतिथ्यतामा सम्पन्न भएको छ ।
कार्यक्रमलाई सम्बोधन गर्दै मुख्यमन्त्री बानियाँले ढुवानी व्यवसायलाई प्रभावकारी बनाउनु अत्यावश्यक रहेको बताउनुभयो । ढुवानी व्यवस्था सुदृढ नहुँदा मुलुकले गम्भीर अप्ठ्यारो भोग्नुपर्ने उल्लेख गर्दै उहाँले यस क्षेत्रको सुधार र कार्यान्वयनमा स्थानीय सरकारहरूलाई समेत सक्रिय हुन आग्रह गर्नुभयो । साथै, जेनजी आन्दोलनका क्रममा पूर्ण रूपमा क्षति भएका सवारी साधनहरूलाई यस आर्थिक वर्षमा कर छुट दिने निर्णय गरिएको जानकारी पनि उहाँले दिनुभयो ।
“ढुवानी व्यवस्था प्रभावकारी नहुँदा देशले धेरै समस्या झेल्नुपर्छ,” बानियाँले भन्नुभयो, “प्रभावकारी ढुवानीले गुणस्तरीय जीवन र समृद्धिको यात्रालाई अघि बढाउन सहयोग पु¥याउँछ । त्यसैले ढुवानी व्यवसाय राष्ट्रका लागि अपरिहार्य छ र यसले भोगेका समस्या चरणबद्ध रूपमा समाधान गर्नुपर्छ ।”
संघका अध्यक्ष पुष्पराज श्रेष्ठले ढुवानी व्यवसाय देशको मेरुदण्ड भएको बताउनुभयो । दुर्गम तथा ग्रामीण क्षेत्रसम्म समयमै सामान पु¥याउने उद्देश्यसहित संघ अघि बढिरहेको र सामाजिक कार्यमा समेत सक्रिय रहेको उहाँको भनाइ थियो । ढुवानी व्यवसायीले अनावश्यक दुःख भोग्नुपरेको उल्लेख गर्दै उहाँले स्पष्ट र एकीकृत ढुवानी ऐन तथा कार्यविधि सुनिश्चित गर्न सरकारसँग माग गर्नुभयो ।
कार्यक्रममा बागमती प्रदेश सांसद उद्धव थापा, नागार्जुन नगरपालिकाकी कार्यवाहक नगरप्रमुख सुशीला अधिकारीलगायतले ढुवानी व्यवसायलाई थप मर्यादित र व्यवस्थित बनाउन जोड दिएका थिए ।